अवैध कब्जा पर सुप्रीम कोर्ट सख्त, अधिकारीक मिलीभगत पर जतौलक नाराजगी

नई दिल्ली। समदिया

दिल्ली आ लखनऊमे हालिया अग्निकांड केर घटना पर कड़ा रख अपनबैत नगर निकायकेँ कड़ा फटकार लगौलक। कोर्ट दिल्ली-एनसीआरमे अवैध अतिक्रमण पर सेहो नाराजगी जतेलक आ सवाल उठेलक जे एहि पर की कार्यवाही भ रहल अछि। अल्टीमेटम जारी करैत कोर्ट कहलक, जँ जमीन पर ठोस कार्यवाही नहि कयल जाएत तँ अवमाननाक प्रक्रिया शुरू भ जाएत।

अवैध अतिक्रमणके मामिलामे सरकारी अधिकारी केर कथित मिलीभगतकेँ ल कय कोर्ट कड़ा नाराजगी जतौलक। संगहि एहि तरहक घटनाक बाद मात्र चेहरा बचाबय लेल अधिकारी द्वारा कयल गेल कार्यवाहीक आलोचना सेहो कयलक अछि। कोर्ट कहलक कि एही त्रासदीक बाद खाली बिल्डरकेँ गिरफ्तार कयल जा रहल अछि, जखनि कि प्रभावित क्षेत्रक प्रभारी अधिकारीकेँ बचाओल जा रहल अछि। रिपोर्टक मांग करैत कोर्ट सुनवाईक अगिला तारीख धरि स्थगित कय देलक।

3 जूनकेँ दिल्लीक मालवीय नगरक एकटा होटलमे भरि अग्निकांड भेल छल, 21 लोकक जान गेल छल। ओतहि 22 जूनकेँ लखनऊक एकटा वाणिज्यिक परिसरमे लागल आगिमे जरि कए 15 गोटेक मृत्यु भ गेल। दिल्ली नगर निकायक कामकाज पर सवाल उठबैत कोर्ट कहलक जे ओ नागरिक निकायक आचरणसँ चिंतित अछि।

अवैध अतिक्रमणसँ जुड़ल एगो याचिकाक सुनवाई करैत जस्टिस अहसानुद्दीन अमानुल्लाह आ जस्टिस शील नागु केर पीठ  मालवीय नगर केर घटना, लखनऊमे आगि लगला आ साकेतमे भवन खासय केर बातक जिक्र करैत टिप्पणी कयलक कि हमरा उम्मीद छल जे अधिकारी द्वारा कार्यवाही कयल जायत, मुदा किछु नहि भेल। कोर्ट इहो पूछलक जे मालवीय नगरक घटनाक बाद दक्षिण दिल्ली नगर निगमक अधिकारीक खिलाफ की कार्यवाही कयल गेल अछि?

सुप्रीम कोर्ट दिल्ली केर लाजपत नगर, साकेत आ सरोजनी नगर जँका क्षेत्रक सर्वेक्षणक निर्देश देलक अछि आ एही लेल एगो विशेषज्ञ समितिक गठनक आदेश देलक अछि। एहि समितिमे आईआईटी दिल्लीक सिविल इंजीनियरिंग विभागक दूटा वरिष्ठ प्रोफेसर, दूटा आईआईटी ड्राफ्टमैन, एमसीडीक अधिकारी आ एकटा कोर्ट द्वारा नियुक्त अधिकारी शामिल हेताह। विशेषज्ञ समिति अपन रिपोर्ट कोर्टमे जमा करत।

20 मईकेँ कोर्ट अधिकारीकेँ सुरक्षा मानदंडक संबंधमे निर्देश जारी करबाक निर्देश देने छल। कोर्ट मीडिया रिपोर्टक सेहो संज्ञान लेलक जे गुरुग्रामक 93 प्रतिशत भवन अग्नि सुरक्षा ऑडिटमे फेल भ गेल अछि। कोर्ट अपन अवलोकनमे कहलक कि अधिकारीकेँ 20 मईकेँ आवश्यक कार्यवाहीक संबंधमे निर्देश देल गेल छल, तइयो आदेशक बावजूद एनसीआरमे अग्निकांडक घटना घटल। कोर्ट सवाल उठेलक जे ओकर निर्देशक बाद अधिकारी की कार्यवाही कयलक।

कोर्ट कार्यवाही नहि करय वला अधिकारीक खिलाफ अवमानना​के प्रक्रियाक चेतावनी देलक अछि। एहिमे एमसीडीक अधिकारीक सहमतिसँ बेतहाशा अवैध निर्माणक काज भेल अछि।