बिहार विधानसभा मानसून सत्र 20 जुलाईसँ शुरू
पटना। समदिया
बिहार विधानसभाक मानसून सत्र 20 जुलाईसँ शुरू होमय वला अछि, राज्यपालक सहमतिक बाद विधायिका एहि पांच दिनक सत्र लेल अधिसूचना जारी कयलक अछि। एहि सत्रक दौरान सरकार 2026-27 केर वित्तीय वर्षक पहिल पूरक बजट सेहो पेश करत।
सरकार मानसून सत्रमे कतेको विधेयक पेश करत। एहि चारि दिनक दौरान सरकार विधानसभा आ विधान परिषद दूनूमे महत्वपूर्ण काज करत। विधान परिषद द्वारा जारी अधिसूचनाक अनुसार सत्र 20 जुलाईसँ शुरू होयत। ओहि दिन पहिल पूरक बजट सदनमे पेश होयत। तत्पश्चात शोक प्रस्ताव सभापतिक दिससँ पढ़ल जायत आ श्रद्धांजलि देल जायत।
दोसर दिन 21 जुलाईकेँ निजी सदस्य संकल्प पर चर्चा होएत। तेसर दिन (22 जुलाई) आ चारिम दिन (23 जुलाई) सरकारी विधेयक पेश कयल जाएत। सत्र केर अंतिम दिन 24 जुलाईकेँ सदनमे 2026-27 केर वित्तीय वर्ष केर पहिल पूरक बजट पर चर्चा कयल जायत आ सरकार विनियोजन विधेयककेँ पारित करय केर मांग सेहो करत।
पहिल दिनकेँ छोड़ि अधिवेशनक शेष चारि दिनमे प्रश्नकाल आयोजन होएत, जाहिमे विधायकक प्रश्नक उत्तर होयत। प्रश्नकालमे सरकारक दिससँ मंत्री उत्तर देताह। मानसून सत्र हंगामादार होयत से आसार अछि, कारण कानून व्यवस्था आ अन्य समस्याकेँ ल कय विपक्षक दिससँ सरकारकेँ घेरय केर कोशिश भ सकैत अछि।
मुख्य विपक्षी पार्टी राष्ट्रीय जनता दलक विधायक गौतम कृष्ण केर कहनाय छनि जे पार्टी एहि अधिवेशनक लेल रणनीति बनाओत। पहिनेसँ कतेको मुद्दा एजेंडामे अछि, जेना कि पार्टीक इरादा अछि कि कथित फर्जी मुठभेड़ आ सरकार द्वारा कयल गेल वादा पूरा करय केर संबंधमे जवाब मांगल जाय।
भोजपुर जिलामे भेल मुठभेड़क घटनाकेँ ल कय सरकार फिलहाल बैकफूट पर अछि। हालांकि न्यायिक जांच चलि रहल अछि, मुदा मानसून सत्रमे मामिला उठेबाक संभावना अछि। एकर अलावा विपक्ष महिलाकेँ लेल रोजगारसँ जुड़ल धन केर दोसर किस्त जारी नहि करय केर संबंधमे सरकारकेँ जवाबक मांग कय सकैत अछि। विधानसभा आ विधान परिषदमे मानसून सत्रक तैयारी शुरू भ गेल अछि।
