रौशन आनंद’क भाई केर होटलमे संदिग्ध मृत्यु

——–खान ग्लोबल स्टडीजक बाहर पुलिसक नोटिस, तीन लोककेँ तलब, अनुपस्थिति पर कार्यवाही तय

पटना। समदिया

ज्ञान बिंदु कोचिंगक संचालक रौशन आनंदक भाई प्रिंस यादवक नेपालक एक होटलमे संदिग्ध परिस्थितिमे मृत्यु भ गेल अछि। घटनाक बाद नेपाल पुलिस हुनका संग मौजूद किछु लोककेँ हिरासतमे ल कय पूछताछ कय रहल अछि। एम्हर एही बीच पटना पुलिस खान ग्लोबल स्टडीजक बाहर एक नोटिस चिपका देलक अछि। एही नोटिसक अनुसार पुलिस तीन गोटेकेँ तलब कयलक अछि। नोटिसमे स्पष्ट लिखल अछि कि आँहाँ सभ थाना आबि अपना-अपन राखु।

सहरसा निवासी आ चर्चित शिक्षक रौशन आनंदक छोट भाई प्रिंस कुमार यादवक नेपालक विराटनगर स्थित एक होटलमे संदिग्ध परिस्थितिमे मृत्यु भ गेल अछि। इ घटना 13 जूनक मध्य रातिमे भेल। घटनाक बाद नेपाल पुलिस एकरा संदिग्ध मानैत जांच शुरू कय देलक अछि। हालांकि अखनि धरि इ स्पष्ट नहि भ पाओल अछि कि हुनक मृत्यु कोन परिस्थितिमे भेल, जाहि कारण मामिलाकेँ ल कय कतेको तरहक अटकल लगाओल जा रहल अछि। परिजन आर रौशन आनंदक समर्थक प्रिंसक हत्याक आरोप लगा रहल अछि।

जनतब दी जे प्रिंस यादवक नाम पहिने पटनामे चर्चित खान सर (फैजल खान) कोचिंग सेंटर पर हमलाक मामिलामे सेहो सामने आबि चुक छल। प्रिंस यादव सहरसा जिलाक निवासी छलथि आ क्षेत्रमे सामाजिक व राजनीतिक गतिविधिमे सक्रिय छलथि। ओ जिला परिषद चुनाव लड़य केर सेहो तैयारी कय रहल छलथि। हुनक अचानक भेल मृत्युक बाद परिजन आ समर्थक मामिलक गहन एवं निष्पक्ष जांचक मांग उठौलनि। ओतय, घटनाकेँ ल कय क्षेत्रमे चर्चाक माहौल अछि आ लोक जांच रिपोर्टक इंतजार कय रहल अछि।

नेपाल पुलिसक अनुसार 13 जूनक राति करीब 11:00 बजे विराटनगर-10 मे स्थित शुभ होटलक एक कमरामे ठहरल प्रिंस केर तबीयत अचानक बहुत बेसी खराब भ गेल। हुनका तुरंत इलाज लेल विराटनगर केर श्री कोशी अस्पताल ल जायल गेल, मुदा अस्पताल पहुंचयसँ पहिने रास्तामे प्रिंस दम तोड़लनि।

अस्पतालमे डॉक्टरों जांचक बाद हुनका मृत घोषित कय देलक। एकर बाद पुलिस कोशी अस्पतालक शवगृहसँ शवकेँ बाहर निकाललक आ ओतय मौजूद गवाहक सामने स्ट्रेचर पर रखलक आ शवक कपड़ा आ बाहरी स्थितिक बारीकीसँ जांच कयलक। मृत्युक सही कारणक पुष्टिक लेल पोस्टमार्टमक प्रक्रिया समाचार सम्प्रेषण धरि पूरा भ चुकल छल, मुदा ओकरा सार्वजनिक नहि कयल गेल छल।