मुंबई हवाई अड्डा पर 5 करोड़ रुपयाक सोना जब्त, 7 गिरफ्तार
मुंबई। समदिया
राजस्व खुफिया निदेशालय (डीआरआई) ऑपरेशन गोल्डन नेक्सस केर तहत मुंबई केर छत्रपति शिवाजी महाराज अंतर्राष्ट्रीय हवाई अड्डा पर सोना तस्करीक एकटा पैघ अंतरराष्ट्रीय रैकेटक भंडाफोड़ कयलक अछि। एहि अभियानक दौरान लगभग 3.2 किलोग्राम विदेशी मूलक 24 कैरेट सोना (मोमक रूपमे) बरामद कयल गेल, जकर कीमत लगभग 5 करोड़ रुपयाक अनुमान अछि। एहि मामिलामे एयरपोर्टक तीन कर्मचारी सहित सात गोटे केर गिरफ्तार कयल गेल अछि। डीआरआई केर अनुसार खुफिया रिपोर्टसँ पता चलल अछि कि हवाई अड्डा केर किछु कर्मचारी बैंकाकसँ आबय वला बांग्लादेशी आ श्रीलंका केर ट्रांजिट यात्रीसँ तस्करी सोना इकट्ठा कय हवाई अड्डा परिसरक बाहर स्थानीय नेटवर्क लग पहुँचा रहल छल।
जानकारीक अनुसार डीआरआई हवाई अड्डासँ बाहर सोनाक खेपक रिसीवर धरि पहुंचेबाक कोशिशमे हवाई अड्डाक तीन कर्मचारीकेँ जाल बिछा कय गिरफ्तार कय लेलक। गिरफ्तार कर्मचारीमे दूटा बस/कोच ड्राइवर आ एकटा कोच मॉनिटर शामिल अछि।
एकर बाद डीआरआई तेजीसँ कार्यवाही कय रैकेटसँ जुड़ल तीन ट्रांजिट यात्रीक पहिचान कय गिरफ्तार कयलक। एहिमे एकटा बांग्लादेशी नागरिक आ दूटा श्रीलंकाक नागरिक शामिल छल जे कनेक्टिंग फ्लाइट पर भारतसँ रवाना हेबाक तैयारीमे छल। जांचमे पता चलल जे ई यात्री सभ सोनाकेँ अपन शरीरक भीतर नुका कय भारतमे तस्करी कयने छल।
डीआरआई कुल 3.2 किलोग्राम 24 कैरेट सोनाकेँ मोमक रूपमे बरामद कयलक, जकर कीमत लगभग ₹5 करोड़ (लगभग 14 लाख डॉलर) छल। ई सोना कस्टम एक्ट, 1962 केर तहत जब्त कएल गेल।
एहि अभियानमे पूरा तस्करी नेटवर्क पर्दाफाश भेल आ सात गोटेक गिरफ्तारी भेल जाहिमे तीनटा ट्रांजिट यात्री, तीनटा हवाई अड्डाक कर्मचारी आ एकटा स्थानीय रिसीवर शामिल छल।
डीआरआई कहलक कि ई सफलता एहन समयमे भेटल जखनि सरकार विदेशी मुद्रा संरक्षण आ आर्थिक सुरक्षा केँ मजबूत करय लेल सोना पर सीमा शुल्क आओर बढ़ा देने अछि ई कार्यवाही डीआरआई केर मजबूत खुफिया नेटवर्क, तेज परिचालन क्षमता आ संगठित तस्करी गिरोहक खिलाफ प्रभावी कार्यवाहीक एगो प्रमुख उदाहरण मानल जायत अछि।
