आँहाँक पेपर लीकक परिभाषा की अछि? – संसदीय समिति एनटीएसँ
नई दिल्ली। समदिया
संसदीय समिति राष्ट्रीय परीक्षण एजेंसी (एनटीए) सँ कहलक अछि जे ओ स्पष्ट करय जे ओकर परिभाषाक तहत पेपर लीककेँ की मानल जाइत अछि। इहो सवाल उठल जे कि 2018 सँ एजेंसी द्वारा आयोजित आओर कोनो परीक्षामे पेपर लीक भेल अछि वा नहि। समिति एनटीए अधिकारीसँ पिछला हफ्ता भेल अपन बैसारक बाद इ सवाल पूछलक अछि।
सूत्रक अनुसार अधिकारीक कहनाय छलनि जे हुनक सिस्टमक माध्यमसँ कोनो पेपर लीक नहि भेल आओर किछु सवाल सिर्फ गेस पेपरक रूपमे प्रसारित भ रहल छल। कांग्रेस सदस्य दिग्विजय सिंहक नेतृत्व वला संसदीय समिति नीट पेपर लीकक मामिला आओर सीबीएसई केर ऑन स्क्रीन मार्किंग सिस्टम (ओएसएम) विवादक जांच कय रहल अछि। समिति एनटीए आ सीबीएसई सहित कतेको वरिष्ठ सरकारी अधिकारीकेँ बजा लेलक।
समिति क्रमशः ओएसएम प्रणाली आ नीट परीक्षासँ जुड़ल मुद्दा पर केंद्रीय माध्यमिक शिक्षा बोर्ड (सीबीएसई) आ एनटीएसँ लिखित प्रतिक्रिया मँगलक। समिति एनटीएसँ पूछलक अछि जे की ओ सीबीआईक जांचसँ अलग नीट-यूजी 2024 केर पेपरमे कथित गड़बड़ीक जांच कयलक।
समिति पिछला तीन सालमे एनटीए केर कर्मचारीक संख्या, 2022 केर बाद नव भर्ती आ उच्च शिक्षा विभागकेँ सौंपल जाय वला वार्षिक रिपोर्टक विवरण सेहो मँगल अछि। सूत्रक अनुसार समिति राधाकृष्णन समितिक प्रत्येक 101 सिफारिश पर विस्तृत रिपोर्ट आ एनटीए द्वारा कयल गेल कार्यवाहीक विवरण सेहो मंगलक अछि।
पूर्व इसरो प्रमुख के. राधाकृष्णनक अध्यक्षता वला विशेषज्ञ समितिक गठन जून 2024मे केंद्र सरकार कयने छल। एकर उद्देश्य एनटीएक माध्यमसँ परीक्षाकेँ पारदर्शी, सुचारू आ निष्पक्ष संचालन लेल सुझाव देबाक छल। एहीमे एनटीएक संरचना आ कार्यप्रणाली, परीक्षा प्रक्रियामे सुधार आ डेटा सुरक्षा प्रोटोकॉलकेँ मजबूत करबासँ जुड़ल सुझाव शामिल छल।
जनतब देब जे 8 जून धरि लिखित जवाब देबय लेल कहल गेल अछि आओर एनटीएकेँ 10 जून धरि। दुनू एजेंसी दिससँ एखन धरि कोनो जवाब नहि देल गेल अछि। संसदीय समिति सीबीएसईसँ इहो पूछलक कि ओएसएम सिस्टम लेल जार कयल गेल विभिन्न रिक्वेस्ट फॉर प्रोपोजल (आरएफपी)मे कथित बदलाव कियैक कयल गेल आ ठेका दै सँ पहिने कोएम्पट केर पृष्ठभूमिक जांच कयल गेल वा नहि।
समिति जानय चाहैत अछि कि सीबीएसईकेँ पता अछि कि कोएम्पट एड्यूटेक आ/वा ओकर निदेशक पहिने ग्लोबरेना टेक्नोलॉजीसँ जुड़ल छल, जकर मूल्यांकन प्रणाली पर 2019 तेलंगाना इंटरमीडिएट रिजल्ट रिव्यूक दौरान सवाल उठल छल। एहि संग इ तथ्य अनुबंध देबाक निर्णयमे कोना शामिल कयल गेल छल।
