टीएमसी विधायककेँ पार्टी छोड़बाक धमकी दैत अछि पुलिस : ममता बनर्जीक आरोप

कोलकता। समदिया

तृणमूल कांग्रेसक सुप्रीमो ममता बनर्जी सोमदिन सरकार आ पुलिस पर गंभीर आरोप लगौलनि। ओ आरोप लगौलनि जे पुलिस टीएमसी विधायककेँ पार्टी छोड़ि भाजपामे शामिल हेबाक लेल डरा रहल अछि। बनर्जी बिना कोनो उचित पुनर्वास योजनाकेँ सड़क पर बेचय वला केर खिलाफ कएल गेल कार्यवाहीक आलोचना सेहो कयलनि।

ममता बनर्जी आरोप लगौलनि जे पश्चिम बंगालमे पुलिस शासन प्रचलित अछि। ओ भारतीय जनता पार्टी पर आरोप लगौलनि जे ओ टीएमसी केर वरिष्ठ नेता अभिषेक बनर्जी आओर कल्याण बनर्जीकेँ मारबाक कोशिश कय रहल अछि। संगहि ओ चेतावनी देलनि जे जँ कोलकातामे टीएमसीक नेता पर भेल हमला केर विरोध करबाक अनुमति नहि देल गेल तँ ओ अपन विरोधकेँ दिल्ली ल जेतीह।

पूर्व मुख्यमंत्री पार्टी कार्यकर्ता आ समर्थक कय ऑनलाइन संबोधित कयलनि। एहि दौरान ओ कहलनि जे टीएमसी कोलकाताक रानी रशमोनी रोड पर धरना देबाक अनुमति मंगलक अछि। मुदा पुलिस एकरा अनुमति नहि देलक। ओ एहि फैसला कय राजनीतिक रूपसँ प्रेरित कहलनि। ओ कहलनि जे इ आंदोलन जारी रहत आ जरूरत पड़ला पर राष्ट्रीय राजधानीमे सेहो विरोध प्रदर्शन करब।

ओ आरोप लगौलनि जे पुलिस धमकी, गिरफ्तारी आ चुनावी हेरफेर केर माध्यमसँ भाजपाक मदति टीएमसीकेँ कमजोर करयमे कय रहल अछि। ओ बजलीह, “हमरा सभकेँ धरना लेल अनुमति नहि देल जा रहल अछि। सड़क लगभग खाली अछि आओर ई मात्र 100 लोकक विरोध अछि। हम सभ पुलिसकेँ चिट्ठी पठेलौंह। जँ ओ सभ ओतय अनुमति नहि देबय  चाहैत छथि तँ ओ सभ दोसर स्थानक सुझाव द सकैत छल। जँ अनुमति नहि देल गेल तँ हम असगर दिल्लीमे विरोध करब।”

ममता बनर्जी केर ई टिप्पणी हालमे राजनीतिक दौराक दौरान टीएमसीक वरिष्ठ नेता अभिषेक बनर्जी आ कल्याण बनर्जी पर हमलाक बाद सामने आयल अछि। एहि हमलामे पार्टीक राष्ट्रीय महासचिव आ डायमंड हार्बरक सांसद अभिषेक बनर्जी घायल भ गेलाह आओर फिलहाल ओ ठीक छथि। एम्हर श्रीरामपुरसँ सांसद आ संसदमे टीएमसी केर मुखर आवाज मानल जाय वला कल्याण बनर्जीकेँ सेहो भीड़ निशाना बनौलक।

भाजपा पर कड़ा हमला करैत ममता बनर्जी आरोप लगौलनि जे ई हमला विपक्षी वरिष्ठ नेता कय समाप्त करबाक जानबूझि कए साजिशक हिस्सा अछि। ओ बजलीह जे अहाँ अभिषेक आ कल्याण बनर्जीकेँ मारबाक प्रयास कयलहुँ। ओ आरोप लगौलनि जे राज्यमे पुलिस शासन हावी अछि आ प्रशासन टीएमसीक राजनीतिक गतिविधि पर व्यवस्थित रूपसँ लगाम लगा रहल अछि।

ओ कहलनि जे पुलिस टीएमसी कए बैसार आ रैली नहि करय द रहल अछि, तइयो हम सभ मजगूतीसँ उभरब। कानून व्यवस्था पूर्ण रूपसँ गड़बड़ अछि आ एक-दू विधायककेँ हटलासँ टीएमसी कमजोर नहि होएत।

ममता बनर्जी आरोप लगौलनि जे राज्यभरिमे हुनक पार्टी कार्यकर्ताकेँ राजनीतिक गतिविधिसँ रोकल जा रहल अछि। ओ बजलीह, “हमर कार्यकर्ताकेँ मीटिंग नहि करय देल जा रहल अछि आ हमरा ससभकेँ बाहर निकलयसँ रोकल जा रहल अछि। हमर 2500 पार्टीक कार्यालयमे तोड़फोड़ भ गेल अछि। ईदगाह पर कब्जा भ गेल अछि आ मिशनरी संस्थान बंद कय देल गेल अछि।”

टीएमसी प्रमुख आरोप लगौलनि जे पार्टी समर्थककेँ झूठ आपराधिक आरोप लगाबय केर धमकी देल जा रहल अछि। ओ कहली जे हमर कार्यकर्ताकेँ धमकी देल जा रहल अछि जे जँ ओ बैसारमे शामिल हेताह तँ हुनका खिलाफ अवैध हथियार आ ड्रग्सक झूठ मामिला दर्ज कयल जाएत।