मुजफ्फरपुर गैंगवारक जिम्मेदारी लेलक बाबुल चौधरी
मुजफ्फरपुर। समदिया
बिहारक मुजफ्फरपुरमे बीतल रविदिन (31 मई, 2026) केर देर सांझ गोविंद नामक अपराधीकेँ गोली मारि हत्या कय देल गेल छल। गैंगवारमे हत्याक संभावना जताओल जा रहल छल। एहनमे पुलिस अखनि ममिलाक जांच कय रहल छल कि एही बीच बाबुल चौधरी नामक शख्स एही घटनाक जिम्मेदारी लेलक अछि। सोमदिन (01 जून, 2026) केर बाबुल एक स्थानीय पत्रकारकेँ अपन ऑडियो भेजलक। हालांकि एही ऑडियोक पुष्टि मैथिल पुनर्जागरण प्रकाश नहि करैत अछि।
ऑडियोमे कहल गेल अछि, “बाबुल चौधरी बोल रहे हैं… गोविंद को हम ही मारे हैं… वो हमको मरवाना चाहता था इसलिए मारे हैं… मेरे लोगों को डिस्टर्ब कर रहा था… काम नहीं करने दे रहा था.. इसलिए हम उसको मारे हैं।”
बाबुल कहलक कि ओकरा (गोविंद) लेल हम बहुत किछु केलौंह आ ओ हमरा धोखा द कय मारय चाहैत छल। हमर सेटिंग कय रहल छल, ताहि लेल हम मारलौंह। एही फोन कॉलमे बाबुल इहो कहलक कि पुलिस-प्रशासनसँ ओकरा कोनो मतलब नहि अछि। “पुलिस-प्रशासन जेना कहत हम करब मुदा एकर (गोविंद) केर लोक फेर किछु करत तँ फेरसँ मारब।”
दोसर दिस फोन कॉलमे बाबुल कोनो रंगदारीक घटनाक जिक्र कयलक अछि। कहि रहल अछि कि गोविंदक संग रंगदारी मामिलामे सेहो ओकरा पर केस भेल छल। अपना संग-संग एहीमे ओ कोनो मंटू शर्मा आ ओमकार सिंह केर सेहो नाम ल रहल अछि। बाबुल ऑडियोमे दावा कय रहल अछि कि गोविंदक चलते ओकरा ऊपर बिना मतलबक इ केस भेल छल। एही कारण ओ कतेको दिन धरि फरार सेहो रहल। गोविंद पर ओ आरोप लगौलक कि इ बहुत रास लोकसँ ओकर मर्डर कराबय लेल लाइनअप कय रहल छल।
आब इंतज़ार जे एही ऑडियो केर सामने अयलाक बाद पुलिस दिससँ कि कार्यवाही कयल जायत अछि। समाचार सम्प्रेषण धरि एही ऑडियोकेँ ल कय वा बाबुल केर सम्बन्धमे पुलिस दिससँ कोनो बयान नहि आयल छल।
