पेट्रोल-डीजलक कीमतमे बढ़ोतरी पर राहुल-खड़गे मोदी सरकारकेँ घेरलनि

नई दिल्ली। समदिया

पेट्रोल आ डीजलक दाममे लगातार बढ़ोतरीकेँ ल कय कांग्रेस पार्टी केंद्र सरकार पर कड़ा हमला कयलक अछि। कांग्रेस नेता राहुल गांधी आओर पार्टीक राष्ट्रीय अध्यक्ष मल्लिकार्जुन खड़गे महंगाईकेँ मुद्दा पर मोदी सरकारकेँ घेरय लेल सोशल मीडिया प्लेटफॉर्म ‘एक्स’ पर उतरि गेलाह। ‘एक्स’ पर अपन पोस्टमे राहुल गांधी लिखने छथि, “महंगाई मानव मोदीक फेरसँ हमला। पेट्रोल-डीज़लक दाम किश्तमे बढबैत छथि ताकि चुपके-चुपके आँहाँक जेब कटैत रहय। हम महीनोसँ आर्थिक तूफान आबय केर बात कहि रहल छलौं। मुदा मोदी जी तहन हमेशा जँका चुनावमे व्यस्त छलथि आ चुनाव खत्म होयते पेट्रोल-डीजल 8 रुपए महंगा कय देलनि। ई आओर बढ़ैत जायत। महंगाई मानव मोदीक एक्कहि काज अछि, चुनावमे वादा आ बाकी समय जनताक जेब पर वार। ओतय, कांग्रेस अध्यक्ष मल्लिकार्जुन खड़गे सेहो पेट्रोल-डीजलक कीमतमे 10 दिनक भीतर चारिम बेर भेल वृद्धिकेँ ल कय सरकार पर निशाना साधलनि। ओ कहलनि कि ‘फ्यूल लूट’ केर सिलसिला अखनि खत्म नहि भेल अछि। खड़गे दावा कयलनि कि पेट्रोलक कीमतमे 7.35 रुपया प्रति लीटर आ डीजलमे 7.53 रुपया प्रति लीटरक बढ़ोतरी दर्ज कयल गेल अछि।

खड़गे अपन पोस्टमे कहलनि कि मोदी सरकार आम लोकक बचतकेँ जराबय केर काज कयलक अछि। ओ यूपीए सरकार आ वर्तमान सरकारक कार्यकालक तुलना करैत दावा कयलनि कि 2004 सँ 2014 केर बीच अंतरराष्ट्रीय कच्चा तेलक कीमतमे 175 प्रतिशतसँ बेसी केर वृद्धि भेल छल, जखनि कि मोदी सरकारक दौरान अंतरराष्ट्रीय क्रूड ऑयलक कीमतमे ओहन बढ़ोतरी नहि भेल।

ओ आरोप लगौलनि कि वर्ष 2014मे पेट्रोलक कीमत 71.41 रुपए प्रति लीटर छल, जे 2026मे बढ़ि कय  102.12 रुपया प्रति लीटर भ गेल। ई 43.01% केर बढ़ोतरी अछि। ओतय, डीजलक कीमत 56.71 रुपयासँ  बढ़ि कय 95.20 रुपया प्रति लीटर पहुंच गेल, जे 67.87% केर बढ़ोतरी अछि। खड़गे दावा कयलनि कि पिछला 12 वर्षमे केंद्र सरकार ईंधनक जरिए 43 लाख करोड़ रुपएक लूट कयलक अछि, जकर मतलब अछि  कि हर दिन ₹1000 केर लूट भेल अछि।

कांग्रेस अध्यक्ष इहो कहलनि कि पेट्रोल आ डीजलक कीमतमे चारिम बेर बढ़ोतरीक संग आई एचपीसीएल, बीपीसीएल आ आईओसी केर शेयरमे क्रमशः 5.8%, 4.44% आ 3.90% केर तेजी आयल। लोकक हित पर मुनाफाकेँ तरजीह देनाई भाजपाक डीएनएमे अछि। ईंधनक कीमतमे सभ बढ़ोतरी घरेलू बजट पर एक आओर मार अछि आ एकर अर्थव्यवस्थाक हर पहलू पर व्यापक असर पड़ैत अछि। किसानसँ ल कय एमएसएमई धरि, समाजक हर तबका भाजपाक एही लूटक खामियाजा भगैत रहल अछि।

खड़गे प्रश्न करैत कहलनि, “हम फेर दोहराबैत छी, एही ‘रोजानाक लूट’ सँ केकरा फायदा भ रहल अछि?”