अंतरराज्यीय हथियार तस्कर गिरोहक बिहारमे पर्दाफाश, कतेको हथियार बरामद, दू महिला बंदी
मोतिहारी । समदिया
बिहारक पूर्वी चंपारण जिलाक ढाका थाना क्षेत्रमे पुलिस एकटा घरमे छापेमारी क’ एकटा अंतरराज्यीय हथियार तस्कर गिरोहक भंडाफोड़ कयलक अछि। एतय पुलिस कतेको हथियार आ गोली बरामद कयलक। एहि मामिलामें पुलिस दूटा महिलाकेँ सेहो गिरफ्तार कयलक।
पुलिसक एकटा अधिकारी बृहस्पतिकेँ कहलनि जे पुलिसकेँ गुप्त सूचना भेटल जे बरेवा गामक निवासी खुर्शीद आलम अपन घरमे अवैध अत्याधुनिक हथियार रखने अछि। एहि सूचनाक बाद एकटा टीम बनाओल गेल। टीम संबंधित मकानक घेराव क’ छापेमारी कयलक। ओ कहलनि जे छापेमारीक दौरान घरक तलाशीक क्रममे कतेको हथियार आ नेपालक रुपैया बरामद भेल अछि। ओ कहलनि जे एतयसँ पुलिस दूटा पिस्टल, दूटा मैगजीन, पाँच जिंदा कारतूस, एकटा देसी बंदूक आ तीन हजार नेपाली रुपैया बरामद कयलक। एहि मामिलामें दूटा महिलाकेँ गिरफ्तार कयलक, जकरासँ पूछताछ क’ रहल अछि। एहि मामलामे अन्य आरोपीक गिरफ्तार करबाक लेल सेहो छापेमारी क’ रहल अछि।
जनतब जे बुधदिन मोतिहारीमे पुलिस हथियार तस्करीक खिलाफ पैघ कार्रवाई कए पाँच तस्करकेँ बन्दी बनेलक। बंदी आरोपी लगसँ पुलिस दूटा देशी पिस्टल, पाँचटा जिन्दा कारतूस, चारिटा मोबाइल फोन आ एकटा ऑटो जब्त केलक। कहल गेल जे पुलिसकेँ गुप्त सूचना भेटल जे किछु संदिग्ध युवक ऑटोसँ शहरक बरियारपुर इलाका दिसि जा रहल अछि। सूचना भेटिते छथौनी थाना पुलिस तत्काल कार्रवाई करैत संदिग्ध ऑटो केर रोकि तलाशी शुरू कयलक। तलाशीक दौरान ऑटोमे बैसल अब्बास खान नामक युवकसँ एकटा देशी पिस्टल बरामद भेल। एकर बाद पुलिस ऑटोमे बैसल सभ युवककेँ हिरासतमे ल’ क’ पूछताछ शुरू केलक। पूछताछमे भेटल जानकारीक आधार पर डीआईयू आ एसटीएफ केर टीम पकड़ीदयाल इलाकामे छापेमारी क’ दोसर युवककेँ गिरफ्तार कयलक। ओकरा लगसँ एकटा आर देशी पिस्टल आ पाँच जिन्दा कारतूस बरामद भेल।
