बिहारक पूर्व मंत्री एकटा राइफल आ गोला-बारूदक संग गिरफ्तार

पटना
*
पुलिस घटनास्थल पर पहुँचल तखन स्कॉर्पियो पर सवार किछु लोक ओतयसँ भागय लागल। पुलिस पीछा केलक आ स्कार्पियो पकड़ल गेल। वाहनक तलाशीमे ५७ गोली आ एकटा राइफल बरामद भेल। एकर बाद पुलिस पूर्व मंत्री छेदी राम आ पूर्व प्रमुख संजय राम सहित पाँच गोटे के गिरफ्तार केलक।
*

बिहारक बक्सरमे पुलिस बड़का कार्यवाही कयलक। बक्सर पुलिस बिहारक पूर्व मंत्री छेदी रामकेँ गिरफ्तार कऽ लेलक। पुलिस छेदी राम आ अन्य दोसर सभकेँ हथियारक संग गिरफ्तार कए लेलक। जानकारीक अनुसार पूर्व मंत्रीक संग चारि गोट आओर लोककेँ सेहो गिरफ्तार कयल गेल अछि। पुलिस एहि सबकेँ राजपुरक बसंतपुर छावनीसँ गिरफ्तार कयलक। पूर्व मंत्रीक वाहनसँ एकटा राइफल आ गोला-बारूद सेहो बरामद कयल गेल।

कहल जा रहल अछि जे ई गिरफ्तारी जमीन हड़पबाक आरोपमे कयल गेल अछि। पूर्व मंत्री छेदी राम विवादित जमीन पर कब्जा करबाक लेल अपन सहयोगीक संग पहुँचल छल। गामक लोक तुरंत पुलिसकेँ सूचना देलखिन। सूचना भेटलापर पुलिसक टीम बसंतपुर छावनी पहुँचल आ पूर्व मंत्री आ हुनक चारि सहयोगीकेँ गिरफ्तार कऽ लेलक। जखन पुलिस पूर्व मंत्री छेदी रामक वाहनक तलाशी लेलक तखन वाहनसँ हथियारक जखीरा बरामद भेल।
जानकारीक अनुसार राजपुर थानाक पुलिस पूर्व मंत्रीक गाड़ीसँ एकटा राइफल आ ५७ गोली बरामद केलक। अंबुज चौबे पूर्व मंत्रीक खिलाफ राजपुर थानामे मामिला दर्ज करौने छलाह। पूर्व मंत्री पर हथियारक नोक पर जमीन हड़पबाक आरोप अछि। एसडीपीओ धीरज कुमार कहलनि जे अंबुज चौबे आ गणेश चौबेक बीच जमीन पर पहिनेसँ विवाद छल। रवि दिन साँझ अंबुज चौबे राजपुर थानामै मामिला दर्ज करवेने छल। अंबुज चौबे कहलनि जे किछु लोक हथियारक नोक पर जबरदस्ती हुनकर जमीन पर कब्जा कऽ रहल छथि। जखन पुलिस घटनास्थल पर पहुँचल तखन स्कॉर्पियो पर सवार किछु लोक ओतयसँ भागय लागल। पुलिस पीछा कयलक आ स्कार्पियो पकड़ल गेल। वाहनक तलाशीमे ५७ गोली आ एकटा राइफल बरामद भेल। एकर बाद पुलिस पूर्व मंत्री छेदी राम आ पूर्व प्रमुख संजय राम सहित पाँच गोटेकेँ गिरफ्तार कयलक। एहिमे पूर्व मंत्रीक दूटा अंगरक्षक शामिल छथि।