गोपनीयताक उल्लंघन मामिलामे मास्टरमाइंड सहित चारि गिरफ्तार

मुजफ्फरपुर।  समदिया

मुजफ्फरपुरमे साइबर धोखाधड़ी गिरोहक चारि सदस्यकेँ गिरफ्तार कयल गेल। कथित तौर पर सोशल मीडिया आ अन्य माध्यमसँ लोककेँ डाटा चोरा कय विदेश पठा रहल छल। बांग्लादेशसँ ओकर संबंधक खुलासा भ गेल अछि। ओकरा सभसँ पूछताछ भ रहल अछि।

साइबर क्राइम टीम, बिहार एसटीएफ, डीआईयू आ जिला पुलिसक संयुक्त अभियानमे एकटा एहन गिरोहक भंडाफोड़ कय देल गेल अछि जे इंस्टाग्राम आईडी आओर फर्जी सिम कार्डक इस्तेमालसँ आम लोकसँ व्यक्तिगत जानकारी चोरा कय एपीआईक माध्यमसँ विदेशमे बेचैत छल। पुलिस उत्तर प्रदेशक गाजीपुरक एकटा, दरभंगाक एकटा आ मुजफ्फरपुरक दू गोटे सहित चारिटा गिरोहक सदस्यकेँ गिरफ्तार कयलक अछि। गिरोहक बांग्लादेश संबंधक सेहो खुलासा भेल अछि।

साइबर धोखाधड़ीक बढ़ैत मामिलाक बाद मुजफ्फरपुरक वरिष्ठ पुलिस अधीक्षक कांतेश कुमार मिश्रक निर्देशनमे नगर पुलिस अधीक्षक मोहिबुल्लाह अंसारीक देखरेखमे एकटा विशेष टीमक गठन कयल गेल। एहि टीमक नेतृत्व साइबर डीएसपी हिमांशु कुमार कयने छलाह, जखन कि स्पेशल टास्क फोर्स (एसटीएफ) केर टीम सेहो समानांतर रूपसँ एहि मामिला पर काज कय रहल छल। तकनीकी आ मानवीय जानकारीक आधार पर पुलिस सबसँ पहिने अहियापुर थाना क्षेत्रसँ  ऋषभ कुमार नामक युवककेँ गिरफ्तार कयलक।

प्रारंभिक पूछताछमे पता चलल कि एही गिरोहमे तीन अन्य सहयोगी सेहो शामिल छल, जकरा संग ओ अंतरराष्ट्रीय स्तर पर साइबर धोखाधड़ी कयलक। ऋषभक जनतबक आधार पर पुलिस उत्तर प्रदेशक गाजीपुरसँ दीपक चौधरी, बिहारक दरिभंगा जिलाक जाले थाना क्षेत्रसँ सुधांशु कुमार आओर मुजफ्फरपुरक हथौरी थाना क्षेत्रसँ साहिल कुमारकेँ गिरफ्तार कयलक अछि। पूछताछक दौरान आरोपी स्वीकार कयलक जे ओ पहिने गैरकानूनी तरीकासँ आम लोकसँ डाटा चोरा लेलक आ फेर ओ सभटा निजी जानकारी विदेशी कंपनीकेँ बेचलक।

एही लेल ओ सभ इंस्टाग्राम आईडी आ फर्जी सिम कार्डक इस्तेमाल कयलक। पुलिस मास्टरमाइंड ऋषभक बैंक खाता सेहो फ्रीज कय देलक, जाहिमे लगभग 4 लाख रुपया जमा भेटल अछि। हुनकासँ चारिटा मोबाइल फोन आ एकटा आईपैड सेहो बरामद कययल गेल अछि, जाहिमे कतेको अवैध इंस्टाग्राम चैनल आ अन्य लिंक छल। गिरफ्तार अन्य तीन अपराधीकेँ तीन मोबाइल फोन सेहो बरामद कयल गेल अछि। पुलिस जांच कय रहल अछि जे आम लोकक निजी डाटा कोन देशमे बेचल गेल। प्रारंभिक जांचमे गिरोहक बांग्लादेशसँ लिंक केर पुष्टि भ गेल अछि।