बिहारमे एनडीए राज नहि, महाचौपट राज’ : अररिया कांड पर तेजस्वी यादव

अररिया । समदिया

अररिया जिलाक फारबिसगंजमे बृहस्पति (9 अप्रैल 2026) केँ घटल सनसनीखेज घटना पर नेता प्रतिपक्ष तेजस्वी यादव सरकार पर जोरदार हमला कएलनि। ओ बिहारक कानून-व्यवस्था पर गंभीर सवाल उठबैत कहलनि जे राज्यमे “एनडीए राज नहि, बल्कि महाचौपट राज” चलि रहल अछि।

दरअसल, फारबिसगंजमे एकटा व्यक्ति बीच बाजारमे दोसर व्यक्तिक गला काटि देलक। ओकरा बाद ओ कटल सिर ल’ क’ सैकड़ों लोकक बीच घूमैत रहल। बादमे मृतकक परिजन आरोपीकेँ पकड़ि क’ पीट-पीटि क’ मारि देलक। एहि घटनाक बाद क्षेत्रमे तनाव व्याप्त भ’ गेल।

तेजस्वी यादव एहि घटनाक तस्वीर अपन एक्स हैंडल पर साझा करैत कहलनि, “ई अछि बिहारक भयावह स्थिति। एक व्यक्ति बीच बाजारमे हत्या क’  कटल सिर ल’ क’ घूमैत रहल, मुदा पुलिस कानून-व्यवस्था संभारएकेँ बजाय अपन जान बचबैत देखायल।”

ओ कहलनि जे, “एहिसँ पैघ उदाहरण की भऽ सकैत अछि जे बिहारमे कानून-व्यवस्था कतेक बदहाल भ’ गेल अछि। बीजेपी-जेडीयूक नेता ‘सीएम चेयर’क खेलमे व्यस्त छथि, आ राज्यमे रोज लूट, हत्या, अपराध आ बलात्कारक घटना बढ़ि रहल अछि।”

तेजस्वी यादव आरोप लगौलनि जे अपराधी सभक हौसला एतेक बढ़ि गेल अछि जे दिनदहाड़े हत्या कएल जा रहल अछि आ कानूनक कोनो डर नहि रहल। “बालू-दारूमे मस्त एनडीए शासनक कारण आम जनता अपनाकेँ असुरक्षित महसूस क’ रहल अछि,” ओ कहलनि।

ओ आगू कहलनि, “बिहारमे एनडीए राज नहि, महाचौपट राज अछि। चुनावक समय फेर जंगलराजक राग अलापल जाएत, मुदा सच्चाई सबहक सामने अछि।”

अंतमे तेजस्वी यादव कहलनि, “हालमे एखनि एकटि प्रोपेगंडा फिल्ममे जे दृश्य देखायल गेल, ओहने घटना आब समाजमे देखाइत अछि। समाजमे जहर घोलल जा रहल अछि, आ ओकर असर आब सामने आबि रहल अछि।”