काल्हि (28 जुलाई) संसदक मानसून सत्रक दौरान लोकसभामे पहलगाम हमला आओर ‘ऑपरेशन सिंदूर’ पर गरमागरम बहस भेल। पहिल सप्ताहक व्यवधानक बाद सत्तारूढ़ गठबंधन आओर विपक्ष आमने-सामने छल। रक्षा मंत्री राजनाथ सिंह सदनमे कहलनि जे ऑपरेशन सिंदूर जारी रहत आ जरूरत पड़ला पर फेरसँ पाकिस्तान पर हमला कयल जायत। एकर संग नेता प्रतिपक्ष गौरव गोगोई पूछलनि कि आतंकी पहलगाम कोना पहुँचल आ ऑपरेशन सिंदूरक दौरान भारतकेँ कतेक विमानकेँ नुकसान भेल।
कांग्रेस सांसद गौरव गोगोई सबसँ पहिने विपक्ष दिसिसँ ऑपरेशन सिंदूर पर अपन बात रखलनि। ओ कहलनि जे, ऑपरेशन सिन्दूरकेँ 100 दिन बादो सरकार 5 आतंकीकेँ नहि पकड़ि सकल अछि। सरकार लग ड्रोन, पेगासस, सैटेलाइट, सीआरपीएफ, बीएसएफ, सीआईएसएफ अछि आ रक्षा मंत्री किछु दिन पहिने ओतय गेल छलाह, मुदा एखनो अहां सभ ओकरा नहि पकड़ि सकलहुं। गोगोई कहलनि जे राजनाथ सिंह जी बहुत जानकारी देलनि, मुदा रक्षा मंत्रीक रूपमे ओ कहियो इ नहि कहलनि जे पाकिस्तानसँ आतंकी पहलगाम कोना पहुंचल आ 26 लोक मारल गेल। हमर सबहक कर्तव्य अछि जे हम सब इ सवाल राष्ट्र हितमे पूछब।
ऑपरेशन सिंदूर पर रक्षा मंत्री राजनाथ सिंह कहलनि जे, “ऑपरेशन सिंदूर हमर सबहक ताकतक प्रतीक छल जाहिमे हम सब ई देखा देलहुं जे जँ कियो हमर नागरिककेँ मारत तँ भारत चुप नहि बैसत। हमर राजनीतिक व्यवस्था आ नेतृत्व बिना कोनो दबावक काज करत। हमर मिसाइल भौतिक सीमाकेँ पार करत, बहादुर सैनिक दुश्मनक कमर तोड़त। हम सब हर रूपमे आतंकवादकेँ समाप्त करय लेल पूर्ण रूपसँ प्रतिबद्ध छी।”
बहसक दौरान भाजपा सांसद बैजयंत पंडा कहलनि जे, ऑपरेशन महादेवमे मारल गेल आतंकीमेसँ एकटा आतंकी पहलगाम हमलामे शामिल छल।
कांग्रेस सांसद दीपेंदर हुड्डा देशक विदेश नीति पर सवाल उठबैत कहलनि जे 11 सालमे पीएम मोदी, विदेश मंत्री आओर अन्य अधिकारी इम्हर-उम्हर घुमैत रहलाह, मुदा ऑपरेशन सिंदूरक बाद एकर वास्तविकता सामने आयल। ओ कहलनि जे जँ भारतकेँ अपन सांसदक प्रतिनिधिमंडल पठेबाक अछि तँ विदेश नीति असफल भऽ गेल। एकर संग ऑपरेशन सिन्दूरक दौरान बहुत संगठन पाकिस्तान केर मददि कयलक। अमेरिका सन देश भारत आ पाकिस्तानकेँ एकहि पैमाना पर तौललक। एक देश आतंकवादकेँ समाप्त करय पर तुलल अछि तँ दोसर आतंकवादीकेँ आश्रय दैत अछि। दुनूकेँ एक संग तौलल नहि जा सकैत अछि। शिवसेना उद्धव गुटक सांसद अरविंद सावंत ऑपरेशन सिंदूर पर चर्चा करैत पूछलनि जे जखनि पाकिस्तान हवाई हमलाक दौरान गुहार लगा रहल छल तखनि भारत बिना कोनो शर्तकेँ युद्धविराम पर कोना सहमत भऽ गेल। भारतकेँ पाकिस्तान पर बहुत शर्त आ प्रतिबंध लगाबै केर चाहैत छल, मुदा भारत ऐना नै कयलक। ओ कहलनि कि अमेरिकी राष्ट्रपति डोनाल्ड ट्रंप लगातार कहि रहल छथि कि ओ भारत-पाकिस्तान युद्धकेँ रोकबेलक, मुदा भारतसँ कियो नै कहलक कि अमेरिकी राष्ट्रपति झूठ बाजैत अछि।
राकांपा शरद पवार गुटक सांसद सुप्रिया सुले कहलनि जे, जा धरि पहलगाम हमलाक आतंकी पकड़ल नहि जायत ता धरि ऑपरेशन सिंदूर अधूरा अछि। ओ कहलनि जे, सत्ताधारी आ विपक्षी दलक नेता एक दोसर पर आरोप लगाबैत रहत, मुदा आतंकी हमलामे जान गंवानिहारक परिवारकेँ तखने न्याय भेटत जखनि आतंकी पकड़ल जायत। एकर संग ओ युद्धविरामक महत्व पर सेहो जोर देलनि। ओ कहलनि जे ओ सांसदक प्रतिनिधिमंडलक हिस्सा सेहो छलीह, जे विदेशमे पठाओल गेल छल। एहि दौरान विदेशमे सब कियो आतंकी हमलाक निंदा कयलक। एहेन सदिखन होइत छै, मुदा भारतक एहि कार्यवाही पर कियो चर्चा नहि कयलक। भारतक युद्धविरामक फैसलाकेँ सब प्रशंसा कयलक।
भाजपा सांसद तेजस्वी सूर्य कहलनि जे, ऑपरेशन सिंदूरक दौरान लड़ाई पुरान युद्धसँ अलग छल। एहि बेर सिर्फ सिपाही नहि लड़ि रहल छल। विदेशसँ आपूर्ति कयल गेल ड्रोन, फेक न्यूज आ एजेंडा एहिमे महत्वपूर्ण भूमिका निभेलक। एहि दौरान भारत चीनी मिसाइलकेँ रोकलक आ चीनमे बनल रक्षा प्रणालीकेँ नष्ट करबामे सेहो सफल रहल। भारत केर कूटनीतिक सफलताक बारेमे बात करैत ओ कहलनि कि कोलंबिया पहिने सेहो पाकिस्तानकेँ समर्थनमे बयान जारी कयलक, मुदा शशि थरूरक नेतृत्वमे भारतीय सांसद ओतय जा कय हुनका सबकेँ पूरा मामिलासँ अवगत करा देलक। एकर बाद कोलम्बिया अपन पुरान बयान वापस कय भारतक पक्षमे बयान जारी कयलक।
