बाढ़ि नियंत्रण विभागक कहब अछि जे कोइलवार तटबंध सहित सभ संवेदनशील तटबंध पर विशेष निगरानी कएल जा रहल अछि। हर 3 किलोमीटर पर बाढ़िसॅं निबटय वाला टीम तैनात कएल गेल अछि।
बक्सरमे गंगा नदी उफान पर अछि, केंद्रीय जल आयोगक रिपोर्टक अनुसार बक्सरमे गंगाक जलस्तर 59.320 मीटरक चेतावनी बिंदु पार कय गेल अछि, जाहि कारण जिलामे बाढ़िक खतरा बढ़ि रहल अछि।
खास कय बक्सर, चौसा, सिमरी, चक्की आ ब्रह्मपुर प्रखंड केर निचला इलाकामे गंडक नदी केर पानि खेत आ घर धरि पहुँचि गेल अछि।
बुधदिन भोरमे जखनि गामक लोक खेतमे गंगाक पानि देखलनि तॅं लोक अपना आ अपन मवेशीकें सुरक्षित स्थान पर लऽ जाय लागलाह। जिला प्रशासन सेहो पूर्ण सतर्क भऽ गेल अछि। सब ब्लॉकमे कंट्रोल रूम बना देल गेल अछि। एकर अतिरिक्त जोनल आ ब्लॉक अधिकारीकें हाई अलर्ट पर राखल गेल अछि।
बाढ़ि नियंत्रण विभागक कहनाय अछि जे कोइलवार तटबंध सहित सभ संवेदनशील तटबंध पर विशेष निगरानी कएल जा रहल अछि। आपदा प्रबंधन आ स्वास्थ्य विभाग सेहो अलर्ट अछि ताकि कोनो भी आपातकालीन स्थितिसॅं निपटल जा सकय।
बक्सर जिला दंडाधिकारी डॉ. विद्यानंद सिंह आ एसपी शुभम आर्य स्वयं गंगाक कातमे पहुँचि स्थितिक जायजा लेलनि। जिला मजिस्ट्रेट जलस्तर चेतावनी सीमा पार करबाक पुष्टि करैत प्रशासन केर पूर्ण तैयार आ प्रत्येक प्रखंडमे सलाह जारी कएल गेल बतौलनि।
एम्हर एसपी शुभम आर्य कहलनि जे, तटबंधक सुरक्षाक लेल पुलिस बलक तैनाती कयल गेल अछि। रामदास ओपी थाना क्षेत्र बाढ़िक पानिसॅं घिरल अछि, ओतय नाव केर व्यवस्था भऽ गेल अछि आ थानाक काज एखनो सुचारू रूपसॅं चलि रहल अछि। मुदा एहि गंभीर स्थितिमे सेहो गंगा घाट पर लोकक लापरवाही नहि रुकि रहल अछि। बच्चा आ वयस्क गंगामे स्नान करैत देखल जाइत अछि, जाहि कारण दुर्घटनाक संभावना अछि।
