भाजपा सांसद निशिकांत दुबे राज ठाकरे केर ‘मारू मुदा, वीडियो नहि बनाऊ’ बयान पर कड़ा हमला कयलनि अछि। ओ ठाकरे भाइ पर बीएमसी चुनाव लेल सस्ता राजनीति करबाक आरोप लगौलनि।
गोड्डा, झारखंडसँ भाजपा सांसद निशिकांत दुबे महाराष्ट्र नवनिर्माण सेना केर प्रमुख राज ठाकरे केर विवादित बयान पर कहलनि जे, बीएमसी चुनावक कारण राज ठाकरे आ शिवसेना (उद्धव ठाकरे गुट) सस्ता राजनीति कय रहल अछि। भाजपा सांसद सेहो ओही भाषामे विवादित बयान दैत कहलनि जे जँ हिम्मत अछि तऽ बिहार, उत्तर प्रदेश वा तमिलनाडु जेबाक चाही, ओतय ‘अहाँके सेहो पटकि-पटकि कऽ मारत।’
निशिकांत दुबे आगू कहलनि जे, हम सदिखन कहैत रहलहुँ अछि जे जखनि अहाँ अपन घरमे, महाराष्ट्रमे छी त’ जँ पैघ बॉस छी त’ बिहार आउ, उत्तर प्रदेश आऊ। तमिलनाडु आऊ। अहाँकेँ पटकि-पटकि कय मारत। ई अराजकता नहि चलत।”
संगहि ओ कहलनि जे, “हम मराठीक सम्मान करैत छी। मराठी एकटा सम्मानजनक भाषा अछि। हम छत्रपति शाहू जी महाराज, छत्रपति शिवाजी महाराज, पेशवा, तात्या टोपे, सबहक सम्मान करैत छी। चाहे ओ तिलक होथि वा लाजपत राय, गोपाल कृष्ण गोखले, स्वतंत्रता आन्दोलनमे सबहक योगदान अछि। हम सब मराठी स्वतंत्रता सेनानीकेँ सम्मान करैत छी। महाराष्ट्रक भारतक स्वतंत्रतामे भारी योगदान अछि।”
भाजपा सांसद इहो कहलनि जे, बीएमसीक चुनाव होबय बला अछि, उद्धव ठाकरे आ राज ठाकरे जे किछु कय रहल छथि, एहिसँ बेसी खराब किछु नहि भऽ सकैत अछि, हम सब एकर विरोध करब। जौं हुनका सबमे हिम्मत अछि तऽ माहिम इलाकामे जा कऽ महिम दरगाहक सामने हिंदी भाषी वा उर्दू भाषी व्यक्तिकेँ पीटि कय देखाबथि तखनि हम स्वीकार करब जे ओ सब सही मायनेमे एकर उत्तराधिकारी छथि बालासाहेब ठाकरेक सिद्धांतकेँ पालन कऽ रहल छथि।”
