देवेन्द्र कुमार मांझी कहलनि जे तेजस्वी यादव एकटा दलितक बेटाकेँ डराबए चाहैत छथि। एहि स्थितिमे कियो दलितक बेटाकेँ हटाबयमे सक्षम नहि छथि।
तेजस्वी यादव सरकार पर हमला करैत कहने छलाह जे बिहार सरकारमे सब कियो अपन बेटा-बेटी आ रिश्तेदारकेँ मुफ्तमे बाँटि रहल अछि। रामविलास पासवान, अशोक चौधरी आ जीतन राम मांझीक जमायके आयोगमे जगह भेटल अछि। डीके बॉसक पत्नीकेँ महिला आयोगक सदस्य बना देल गेल अछि। आखिर की भ’ रहल अछि ?
ताहि पर आब देवेन्द्र कुमार मांझी नेता प्रतिपक्ष तेजस्वी यादवक आरोप पर जवाबी हमला कयलनि।
असलमे देवेन्द्र कुमार मांझीकेँ राज्य अनुसूचित जाति आयोगक उपाध्यक्ष बना देल गेल अछि। देवेन्द्र मांझी केंद्रीय मंत्री जीतन राम मांझीक जमाय छथि। तेजस्वी यादव आरोप लगौलनि अछि जे बिहारमे करीबी रिश्तेदारकेँ संवैधानिक पद देल गेल अछि। एहि पर जीतन राम मांझीक जमाय कहलनि जे “तेजश्वी यादव एकटा दलितक बेटाकेँ डराबय चाहैत छथि। हम इंजीनियर छी, हम 25 सालसँ समाजक सेवा कय रहल छी। तेजस्वी एहि पद पर दलितक बेटाकेँ हाटाबयमे सक्षम नहि छथि।”
देवेन्द्र कुमार मांझी इहो कहलनि जे हम लालू यादवकेँ नोटिस जारी कयलहुँ। वायरल वीडियोक आधार पर लालू जीसँ जवाब माँगल गेल अछि। वायरल वीडियोमे लालू यादव बाबा साहेबक तस्वीरक अपमान करैत देखल जा रहल छथि। जँ जवाब नहि भेटल तऽ आयोग पुलिसकेँ प्राथमिकी दर्ज कय कार्यवाही करबा लेल कहत।
जनतब जे सरकार पर हमला करैत तेजस्वी यादव इहो पूछने छथि जे नीतीशक प्रधान सचिवक पत्नी जे सेवानिवृत्त अधिकारी छथि हुनका महिला आयोगक सदस्य किएक बनाओल गेल ? भाजपा-जदयू केर नेता आ कार्यकर्ता अपन बारीक इंतजारमे रहलाह। परिवारक सदस्यकेँ मात्र जगह देल जा रहल अछि। आयोगमे ई लोकनि कोन काज करताह ? ई लोक सभ सचिवालय आओर सुप्रीम कोर्टक पैनलकेँ सेहो बर्बाद कय देलनि। ई सबटा ओहि नेता सभक हाथमे लऽ लेल गेल अछि जे सीएम केर आवासमे भुजा पार्टी करैत छथि। एकर जाँच हेबाक चाही, ई गंभीर मुद्दा अछि।
