सीएम सम्राटक सड़क-पुल विकासक महाअभियान
सम्राट सरकारक 21 हजार करोड़क ऐतिहासिक पहल, नाबार्ड संग भेल करार, मिथिला सहित पूरा बिहारमे विकासक भेटत रफ्तार
पटना । समदिया
बिहारमे सड़क आ पुल अवसंरचनाक विकासकेँ नव गति देबाक दिशामे मुख्यमंत्री सम्राट चौधरीक नेतृत्वमे एकटा पैघ कदम उठाओल गेल अछि। मुख्यमंत्रीक उपस्थिति मे लोक सेवक आवास स्थित ‘संकल्प’ सभागारमे पथ निर्माण विभाग आ राष्ट्रीय कृषि एवं ग्रामीण विकास बैंक (नाबार्ड)क बीच 21 हजार करोड़ रुपैयाक दीर्घकालिक वित्त पोषण लेल समझौता ज्ञापन (एमओयू) पर हस्ताक्षर भेल।
पथ निर्माण विभागक सचिव पंकज कुमार पाल आ नाबार्डक अध्यक्ष शाजी कृष्णन वी. एहि समझौतापर हस्ताक्षर केलनि। एहि अवसर पर मुख्यमंत्री सम्राट चौधरी कहलनि जे बिहारक विकास यात्रामे नाबार्डक सहयोग अत्यंत महत्वपूर्ण रहल अछि आ आगाँ सेहो एहि प्रकारक सहयोग जारी रहत, एहि बातक पूर्ण विश्वास अछि।
मुख्यमंत्री कहलनि जे राज्य सरकार सड़क आ पुल अवसंरचनाकेँ सशक्त बनेबाक लेल निरंतर कार्य कऽ रहल अछि। एहि समझौतासँ विशेष रूपसँ ग्रामीण क्षेत्रमे सड़क आ पुल निर्माण परियोजनाकेँ पर्याप्त वित्तीय संसाधन उपलब्ध हेतै, जाहिसँ विकास कार्यमे तेजी आबि सकत। हुनका अनुसार मजबूत सड़क संपर्कसँ आवागमन सुगम होएत, व्यापार-व्यवसाय बढ़त आ ग्रामीण अर्थव्यवस्थाकेँ नव बल भेटत।
नाबार्डक अध्यक्ष शाजी कृष्णन वी. कहलनि जे बिहार तीव्र गतिसँ विकासक पथ पर अग्रसर अछि। राज्यक आधारभूत संरचनाकेँ मजबूत बनेबाक लेल नाबार्ड हरसंभव सहयोग दैत रहत।
एहि अवसर पर मुख्यमंत्री ‘नाबार्ड इन बिहार’ पुस्तकक विमोचन सेहो केलनि। समारोहमे पारंपरिक कला आ शिल्पक क्षेत्रमे उल्लेखनीय योगदान लेल भोजपुरक संजीव सिन्हाकेँ पिड़िया पेंटिंग, गयाक रविंद्र नाथ गौड़केँ पत्थर कट्टी कला तथा नालंदाक सुरेश देवकेँ बावन बूटी कला लेल जीआई प्रमाण-पत्र प्रदान कऽ सम्मानित कएल गेल।
कार्यक्रममे उपमुख्यमंत्री बिजेंद्र प्रसाद यादव, पथ निर्माण मंत्री कुमार शैलेन्द्र, मुख्यमंत्रीक प्रधान सचिव दीपक कुमार, पथ निर्माण विभागक सचिव पंकज कुमार पाल, नाबार्डक वरीय पदाधिकारी आ राज्य सरकारक अनेक वरिष्ठ अधिकारी उपस्थित छलथि।
