अनुमंडल अस्पताल बेनीपुरमे करोनाक संभावित लहरिसँ बाँचय हेतु जोरदार तैयारी प्रारंभ कऽ देल गेल अछि । प्रचुर मात्रामे ऑक्सीजन सिलेंडर , आईसीयू , वेंटीलेटरक संग प्रचुर मात्रामे बेड तैयार राखबाक तैयारी लगभग पूरा कऽ लेल गेल अछि है।
ज्ञातव्य अछि जे पछिला सप्ताह स्थानीय विधायक प्रोफेसर विनय कुमार चौधरी देश भरिसँ आबि रहल कोरोना मरीजक बढैत संख्याकेँ लऽ कऽ अनुमंडल अस्पतालमे व्यापक तैयारीक आवश्यक दिशा निर्देश देने छलाह। ओ आइ फेर: अनुमंडल अस्पताल पहुंचिकय कयल गेल तैयारीक जानकारी लेलन्हि।
अस्पतालक ऊपरी तल पर 50 बेड नव सिरासँ लगाओल गेल अछि। ऑक्सीजनक पाइपलाइन सप्लाई केर संग-संग सिलेंडरक भरपूर व्यवस्था कयल गेल अछि। अस्पतालमे पहिनेसँ चारिगो वेंटिलेटर उपलब्ध अछि जे की विधायक ऐच्छिक निधिसं पछिला करोनाक समयमे खरीदल गेल छल, तकरा एक्टिवेट कऽ देल गेल अछि। एहि केर संगहि अन्यान्य आईसीयू वार्ड सभ लेल सेहो व्यापक तैयारीक संग सभ आवश्यक व्यवस्था कयल जा रहल अछि।
निरीक्षणक दौरान विधायक चौधरी अस्पताल प्रबंधककें निर्देशित करैत रक्तदान शिविर आयोजित करबाक बात कहलन्हि। ब्लड बैंकक वर्तमान स्थितिक संबंधमे जानकारी मांगला पर प्रबंधक द्वारा ब्लड उपलब्ध हेबाक बात बताओल गेल। एहि केर संगहि ऑक्सीजन जेनरेशन प्लांटक मरोम्मतिक लेल बीएमआईसीएलकेँ लिखल जयबाक बात बतेलनि आ जल्दिये मरम्मत भऽ जयबाक आशा कयल गेल। अधिकांश चिकित्सकक अनुपस्थिति पर विधायक चौधरी आइ एक बेर फेर अपन नाराजगी व्यक्त करैत चिकित्सक सबहक अनुपस्थिति पर उच्च अधिकारीकेँ लिखबाक संग स्वयं विभागीय अधिकारीसँ बात कयलनि।
निरीक्षणक दौरान अस्पतालक प्रभारी उपाधीक्षक कुमारी भारती, अस्पताल प्रबंधक राहुल सिंह आ मात्र एकटा चिकित्सक किरण भारती उपस्थित छलीह। ओहि दौरान ओ साफ सफाई केर व्यवस्था पर संतोष व्यक्त कयलन्हि।
