पटनामे रोड शो लेल 32 ठाम स्टेज बनाओल जा रहल अछि। ई कार्यक्रम राजनीतिक दलक बैनरक अंतर्गत नहि अछि। हुनक अभिवादन ऑपरेशन सिंदूरक तहत भऽ रहल अछि।चुनावी वर्षमे ऑपरेशन सिंदूर केर सफलताक बाद प्रधानमंत्री नरेंद्र मोदी पहिल बेर दू दिवसीय दौरा पर 29 मईकेँ बिहार आबि रहल छथि। पीएम मोदी कतेको पैघ सौगात सेहो देताह। पटना वासी सभक अभिवादन करबा लेल रोड शो सेहो करताह। प्रधानमंत्री प्रदेश कार्यालय सेहो जयताह आ नेता सबसँ भेटताह।
दोसर दिन (30 मई) हुनकर रोहतासक बिक्रमगंजमे कार्यक्रम होबय बला अछि। प्रधानमंत्रीक आगमनकें देखैत एयरपोर्टसँ प्रदेश कार्यालय धरि चाक-चौबंद व्यवस्था कयल जा रहल अछि।
कार्यक्रमक बारेमे जानकारी दैत बीजेपी केर प्रदेश अध्यक्ष दिलीप जायसवाल मंगलकेँ कहलनि कि 29 मई केर साँझ पाँच बजे प्रधानमंत्री नरेंद्र मोदी पटना एयरपोर्ट पहुँचताह। जे भव्य एयरपोर्ट बनि कऽ तैयार भेल अछि ओकर उद्घाटन करताह। ओतहिसँ पीएम बिहटा एयरपोर्टक शिलान्यास सेहो करताह।
एयरपोर्टसँ रोड शो शुरू भऽ जाएत। ई रोड शो डुमरा चौकी, शेखपुरा मोड़, पटेल भवन, राजवंशी नगर, पुनाईचक, हाईकोर्टसँ होइत इनकम टैक्स गोलंबर धरि होएत। एतहिसँ भारतीय जनता पार्टी केर कार्यालय धरि यात्रा जाएत। पार्टी कार्यालयमे पहुँचि रोड शो समाप्त होएत।
दिलीप जायसवाल द्वारा कहल गेल कि एतबा दूरक रोडशोमे सड़कक बामा कात 32 ठाम पर स्टेज बनाओल जा रहल अछि। ओही स्टेजसँ हुनकर अभिनंदन कएल जाएत। ओ कहलनि कि बहुत रास एनजीओ आ सामाजिक संस्था केर माध्यमसँ ओहि स्टेज पर देशभक्ति कार्यक्रम केर आयोजन होएत। ई कार्यक्रम राजनीतिक दलक बैनर तले नहि होएत। हुनकर अभिनंदन ऑपरेशन सिंदूर केर तहत भऽ रहल अछि। एहिमे लाखों लोककेँ शामिल होयबाक संभावना अछि। पूरा रास्तामे कोनो राजनीतिक दलक झंडा नहि रहत। सभक हाथमे तिरंगा झंडा होयत।
दोसर दिन 30 मईकेँ रोहतासक बिक्रमगंजमे भोर 10 बजे भव्य कार्यक्रम होएत। ई पहिल मौका होएत जखनि कोनो प्रधानमंत्री एतेक भोरे कोनो कार्यक्रम करय जा रहल होइथ। प्रधानमंत्री बिक्रमगंजसँ 29000 करोड़क नबीनगरक पावर प्रोजेक्ट योजनाक शिलान्यास करताह आ एतहिसँ पटना-सासाराम एक्सप्रेस-वे केर शिलान्यास करताह।
