उत्तर प्रदेश स्थित संभलमे जामा मस्जिद सर्वेक मामिलामे इलाहाबाद हाईकोर्टसँ मुस्लिम पक्षकेँ झटका लागल अछि। इलाहाबाद हाईकोर्ट मुस्लिम पक्षक सिविल रिवीजन पिटीशनकेँ खारिज कय देलक।
हाईकोर्टक एहि निर्णयसँ स्पष्ट भऽ गेल अछि जे संभल केर जिला अदालतमे सर्वेकेँ मुकदमा आगू बढ़त। जस्टिस रोहित रंजन अग्रवालक सिंगल बेंच मुस्लिम पक्षक दलीलकेँ नामंजूर कऽ देलनि। 13 मईकेँ मस्जिद कमेटी सिविल रिवीजन पिटीशन पर बहस समाप्त भेला केर बाद हाईकोर्ट फैसला सुरक्षित रखने छल। संभलक जामा मस्जिद आ हरिहर मंदिरक विवाद पर मस्जिद कमेटी द्वारा सिविल रिवीजन याचिका दाखिल कएल गेल। मस्जिद कमेटी इलाहाबाद हाईकोर्टमे मुकदमाक पोषणीयताकेँ चुनौती देलनि। मस्जिद कमेटी द्वारा 19 नवंबर 2024 केँ सिविल कोर्टक फैसलाकेँ सेहो चुनौती देल गेल छल।
जनतब जे संभलक शाही जामा मस्जिद बनाम श्री हरिहर मंदिर मामिलामे 24 नवम्बरकेँ महंत ऋषिराजक याचिका पर अधिवक्ता विष्णुशंकर जैन कोर्टमे अपील केलनि। सिविल कोर्टक बाद मस्जिद बनाम मंदिर मामिला हाईकोर्टमे पहुँचि गेल। नवम्बर 2024 मे मस्जिदक सर्वे भेल छल, जकर मस्जिद कमेटी विरोध केलनि। ई सर्वे स्थानीय अदालतक आदेश पर भेल छल। सर्वेक बाद एकर रिपोर्ट स्थानीय अदालतमे कमिश्नरक अगुवाईमे जमा कय देल गेल छल।
पहिलका सर्वे जे अदालतक आदेशक तुरंत बाद 19 नवम्बरकेँ भेल, तँ ओहिठाम एकटा अन्य सर्वे 24 नवम्बर कय भेल आ ओही समय हिंसा भड़कल छल, जाहिमे चारि लोकक मृत्यु भेल छल। हिंसाक मामिलामे एखनि धरि 70 सँ बेसी लोककेँ गिरफ्तार कय अदालत द्वारा जेल भेजल जा चुकल अछि।
काल्हि सोमकेँ बेंच मुस्लिम पक्षक दलीलकेँ नामंजूर करैत फैसला सुनौलक। अधिवक्ता विष्णु शंकर जैन एक्स पर लिखलनि, संभल मामिलामे मस्जिद पक्षक याचिका खारिज कएल गेल। दलील देल गेल छल कि कोर्ट एकपक्षीय सर्वे कमीशनर केर नियुक्त नहि कऽ सकैत अछि। स्टे हटि गेल अछि। हाईकोर्टक एहि फैसलासँ आब ई साफ भऽ गेल अछि जे संभल केर जिला अदालतमे सर्वेक मुकदमा आगू चलत।
