बिहारमे BPSC TRE-4 लेल 32,388 शिक्षक पद पर बहालीक विज्ञापन जारी

पटना । समदिया

बिहारमे चारिम चरणक शिक्षक भर्ती परीक्षा (TRE-4) केर प्रतीक्षा आब समाप्त भऽ गेल अछि। बिहार लोक सेवा आयोग (BPSC) मंगलदिन 32,388 शिक्षक पद पर नियुक्तिक लेल विज्ञापन जारी कऽ देने अछि। विज्ञापन जारी होइत शिक्षक अभ्यर्थी सभमे उत्साहक माहौल देखल गेल।

एहि भर्तीमे सभसँ बेसी 16,101 पद कक्षा 11 सँ 12 धरि शिक्षक लेल निर्धारित कएल गेल अछि। प्राथमिक आ माध्यमिक स्तर पर सेहो महत्वपूर्ण संख्यामे पद खाली अछि।

पदक विवरण

कक्षा – पदक संख्या

कक्षा 1 सँ 5 – 3,847

कक्षा 6 सँ 8 – 8,563

कक्षा 9 सँ 10 – 3,877

कक्षा 11 सँ 12 – 16,101

कुल – 32,388

शिक्षाक क्षेत्रमे शिक्षकक कमी दूर होएत : सीएम सम्राट चौधरी

मुख्यमंत्री सम्राट चौधरी हालहिमे सोशल मीडिया पर TRE-4 संबंधी जानकारी साझा कयने छलाह। ओ कहलनि जे शिक्षा विभागक दिसिसँ BPSC केँ शिक्षक बहाली लेल अधियाचना पठा देल गेल अछि।

मुख्यमंत्री कहलनि जे सरकार युवासभकेँ बेसीसँ बेसी रोजगारक अवसर उपलब्ध कराबय आ बिहारक शिक्षा व्यवस्थाकेँ नव ऊँचाइ धरि लऽ जाए लेल लगातार काज कऽ रहल अछि। हुनकर कहब छल जे एहि बहालीसँ हजारों युवाकेँ सरकारी नौकरी भेटत आ राज्यक विद्यालयमे शिक्षकक कमी सेहो दूर होएत।

धरना पर बैसल छलाह शिक्षक अभ्यर्थी

TRE-4 क विज्ञापन जारी करबाक मांगकेँ लऽ कऽ शिक्षक अभ्यर्थी कतेको माससँ आंदोलन करैत छलाह। मंगलदिन छात्र नेता दिलीप कुमारक नेतृत्वमे सैकड़ों अभ्यर्थी गर्दनीबाग धरनास्थल पर पहुँचि आंदोलन कऽ रहल छलाह।

अभ्यर्थी TRE-4 क विज्ञापनक संग BSSC परीक्षा तिथिक घोषणा, लाइब्रेरियन बहाली, BET, दरोगा आ सिपाही बहाली सहित विभिन्न प्रतियोगी परीक्षामे पारदर्शिता आ समय पर परीक्षा आयोजित करबाक मांग कऽ रहल छलाह।

आब BPSC द्वारा 32,388 शिक्षक पदक विज्ञापन जारी कएल गेलासँ अभ्यर्थी सभकेँ बहाली प्रक्रियामे आगाँ बढ़बाक उम्मीद मजबूत भेल अछि।