संसदक शीतकालीन सत्र ४ दिसंबरसँ शुरू

सरकार २४ विधेयकक सूची बनेलक

नई दिल्ली । समदिया

संसदक शीतकालीन सत्र ४ दिसम्बरसँ प्रारम्भ भऽ रहल अछि। एहिसँ पहिने केन्द्र २ दिसम्बरकेँ सर्वदलीय बैसार बजेने अछि। संसदीय कार्यमंत्री प्रहलाद जोशी केंद्र सरकारक तरफसँ ई जानकारी देलनि। वर्तमानमे केन्द्र सरकार चलि रहल शीतकालीन सत्रक लेल २४ विधेयक सूचीबद्ध कयलक अछि, ओ कहलक जे आबयवला एक-दू दिनमे सूचीकेँ अन्तिम रूप देल जायत आ सरकार सर्वदलीय बैसारमे सभ विपक्षी दलकेँ एकर जानकारी देत।

जम्मू आ कश्मीर मे सीट बढ़ि सकैत अछि। लोकसभा सचिवालयक अनुसार, केन्द्र सरकार एकटा विधेयक पेश करबाक योजना बना रहल अछि जाहिमे तेलंगानामे केन्द्रीय जनजातीय विश्वविद्यालयक स्थापना एवं महिला आ अनुसूचित जनजातिकेँ जम्मू-कश्मीर आ पुडुचेरीक केन्द्र शासित प्रदेशक विधान सभामे प्रतिनिधित्व करबाक लेल आरक्षण प्रदान करब सम्मिलित अछि।

IPC, CrPC मे बदलाव कएल जायत । सरकारी विधेयकक अतिरिक्त, भारतीय दण्ड संहिता, दण्ड प्रक्रिया संहिता आ भारतीय साक्ष्य अधिनियमकेँ स्थापन्न करयवला विधेयक- भारतीय न्याय संहिता विधेयक, भारतीय नागरिक सुरक्षा संहिता विधेयक एवं भारतीय साक्ष्य विधेयक लोकसभामे चर्चा आ पारित करय लेल तय कयल गेल अछि।