बिहारक तीस सांसद शुक्रदिन संसद परिसरमे प्रधानमंत्री नरेन्द्र मोदीसँ भेंट कयलनि। एहिमे भाजपा आ जदयूक सांसद शामिल छलाह। एहि विशेष अवसर पर दरभंगाक सांसद गोपालजी ठाकुर प्रधानमंत्री मोदीकेँ मिथिलाक पाग पहिरा कऽ सम्मानित कयलनि। ओ प्रधानमंत्रीकेँ माल्यार्पण सेहो केलनि।
एकर अतिरिक्त, ओ प्रधानमंत्रीकेँ मिथिला चित्रकला, मखान आ फूलक गुलदस्ता उपहार स्वरुप भेंट कयलनि, जकरा ओ सहर्ष स्वीकार कयलनि। एम्हर ललन सिंह प्रधानमंत्रीकेँ एकटा पुस्तक सेहो उपहारमे देलनि।
एहि विशेष अवसर पर दड़िभंगासँ सांसद गोपाल ठाकुरक अलावा जदयू नेता संजय झा, ललन सिंह, केंद्रीय मंत्री गिरिराज सिंह आ लोक जनशक्ति पार्टी (राम विलास) प्रमुख चिराग पासवान सहित अन्य सांसद उपस्थित छलाह।
प्रधानमंत्री नरेन्द्र मोदीसँ भेँटक खुशी साफ सभ सांसदक चेहरा पर स्पष्ट रूपसँ देखाइत छल।
उल्लेखनीय अछि जे एखनि संसदक बजट सत्र चलि रहल अछि। एहि सन्दर्भमे प्रधानमंत्री नरेन्द्र मोदी आ बिहारक सांसदक बीच भेँट राजनीतिक वृत्तमे महत्वपूर्ण चर्चाक विषय अछि। एहि बेर बजटमे बिहारक लेल विशेष घोषणा सेहो कैल गेल अछि। मखान बोर्डक स्थापना, कोसी नहर परियोजनाक लेल सहायता आ पटना हवाई अड्डाक विस्तारक सम्बन्धमे घोषणा कयल गेल अछि।
१ फरवरीकेँ बजट प्रस्तुतिक क्रममे केन्द्रीय वित्त मंत्री निर्मला सीतारमण मिथिला चित्रकलासँ सजल साड़ी पहिरने छलीह। ई साड़ी बहुत ध्यान आकर्षित कयलक। मधुबनी चित्रकलाक विशेषज्ञ मानल जायवला दुलारी देवी केन्द्रीय मंत्रीकेँ ई साड़ी उपहारमे देलनि। जखनि ओ ई साड़ी निर्मला सीतारमणकेँ भेंट कयलनि, तखनि ओ इहो उल्लेख कयलनि जे बजट सत्रक दौरान एकरा जरूर पहिरबाक चाही, कियैक तँ एहिसँ मिथिलाक गौरव आ सम्मान बढ़त।
