प्रगति यात्राक दौरान मुख्यमंत्री नीतीश कुमार बेगूसरायमे महिलाकेँ पहिरय वाला कपड़ा पर बयान देने छलाह, जकर बाद बिहारक राजनीति पूरा गरम भऽ गेल अछि। विपक्ष नेता मुख्यमंत्रीक बयान पर सवाल तक उठौने छलाह जे हुनका अपन महिला मंत्री आ विधायकसँ पूछबाक चाही जे 2005 सँ पहिने ओ की पहिरैत छलाह। एकर अतिरिक्त तेजस्वी यादव अपशब्दक प्रयोग सेहो कयलनि। आब नीतीश कुमारक मंत्री अशोक चौधरी मंगलदिन तेजस्वी यादवक बयान पर बड़का हमला कयलनि आओर 2005 सँ पहिने लालू राबड़ी शासनक दौरान लाठी पिलावन रैलीक जिक्र करैत हुनकर मानसिकताकेँ उजागर कयलनि।
अशोक चौधरी कहलनि जे देखू, भाषाक परिमार्जिता आब नहि अछि । राजद उद्दंडक पार्टी अछि जे 2005 सँ पहिने जे लोक छल ओकर एहि राज्यक प्रति केहन भावना छल। कोनो महिला साँझमे बाहर निकलला पर सुरक्षित महसूस नहि करैत छल। ई लोकनि लाठी पिलावन, लाठी घुमावन रैलीकेँ आयोजन करैत छलाह, हुनका सबसँ की आशा कयल जा सकैत अछि | चारवाहा विद्यालय बनेनिहार लोकसँ सभसँ की इंजीनियरिंग कॉलेज आ मेडिकल कॉलेज बनेनिहार लोकक मानसिकता बराबर भऽ सकैत अछि।
अशोक चौधरी कहलनि जे, एहेन भाषाक प्रयोग करय वाला के ईहो नहि बुझल छनि जे ई कोन संदर्भमे कहल जा रहल अछि आ कोन भाषाक प्रयोग करबाक चाही। राज्यक महिलाक लेल हुनकासँ की उम्मीद कएल जा सकैत अछि। ओ कहला जे जखनि तेजस्वी यादव नीतीश कुमारक संग अबैत छथि तखन हुनकर भाषा देखू। हुनकर भाषा की अछि आ जखन नीतीश कुमारकेँ छोड़ि दैत छथि आ दोसरक संग चलि जाइत छथि, तखनि हुनका लोकनिक भाषा की छनि ? तेँ ई स्पष्ट भ’ जाइत अछि जे जखन वैह व्यक्ति अहाँक लग अबैत छथि त’ ओ चंदन-वंदन योग्य भ’ जाइत छथि आ जखन अहाँ केँ छोड़ि दैत छथि त’ अहाँ एहि प्रकारक भाषाक प्रयोग करैत छी ।
मुख्यमंत्री नीतीश कुमारक देल गेल बयानकेँ बतबैत अशोक चौधरी कहलनि जे हमर नेता कहने छलाह जे 2005 सँ पहिने जखनि लोक जीविकासँ नहि जुड़ल छल तऽ हुनकर जीवनशैली केहन छल आ 2005 केश्र बाद जखनि लोक जीविकासँ जुड़ि गेल छथि तखनि हुनकर जीवनशैली, पहिरन-ओढ़न, रहन-सहन बदलि गेल अछि, ओ नीक कपड़ा पहिरय लागल छथि। नीक जकाँ बाजए लगलीह अछि। हुनकर मनोबल बढ़ि गेल छनि। काज करब शुरू कऽ देने छथि। ओ अपनहि आगू बढ़ि रहल छथि। हमर आधा आबादीकेँ बढ़बाक मौका भेटल अछि। राज्यक मुख्यमंत्रीसँ संवाद करय वाली महिला जे कहैत छलीह जे अहाँ बहुत नीक काज कयलहुँ अछि. मुख्यमंत्री एहि बातसँ खुश छलाह।
जनतब जे सीएमकेँ कपड़ा पहिरयवाला बयान पर नेता प्रतिपक्ष तेजस्वी यादव कहने छलाह जे बिहारक नाम पूरा देशमे लज्जित कऽ देलनि अछि। हमरा सभक माथ झुकाबएबला काज ओ कयलनि छथि । नीतीश कुमारक बयानक जतेक निंदा कएल जाए ओ कम होएत। ओ कोना कहि सकैत छथि जे बिहारक महिला पहिने कपड़ा नहि पहिरैत छलीह। एहिसँ बेसी शर्मनाक बयान नहि भऽ सकैत अछि। नीतीश कुमार अपन महिला विधायक आ मंत्रीसँ पूछथि जे की ओ पहिने कपड़ा नहि पहिरैत छलीह। मुख्यमंत्री बेर-बेर महिला पर एहन घृणित बात कहैत रहैत छथि, से हम सब बर्दाश्त नहि करब।
