कांग्रेस नेता सोनिया गांधी, प्रियंका गांधी वाड्रा आ लोकसभामे विपक्षक नेता राहुल गांधी शुक्रदिन पूर्व प्रधानमंत्री मनमोहन सिंहक निवास पर जा कए हुनका श्रद्धांजलि देलनि।
कांग्रेसक राष्ट्रीय अध्यक्ष मल्लिकार्जुन खड़गे सेहो मनमोहन सिंहकेँ श्रद्धांजलि देलनि। सोशल मीडिया प्लेटफॉर्म एक्स पर एकटा पोस्टमे ओ कहलनि, “राष्ट्रक लेल हुनक विशिष्ट सेवा आ असाधारण योगदानकेँ सदैव स्मरण कयल जायत।”
एहिसँ पहिने कांग्रेस नेता राहुल गाँधी पूर्व प्रधानमंत्रीक सङ्ग बितायल क्षणकेँ स्मरण कयलनि। ओ एक्स पर कहलनि, “मनमोहन सिंह जी असीम बुद्धिमत्ता आ निष्ठाक संग भारतक नेतृत्व कयलनि। अर्थशास्त्रक प्रति हुनक विनम्रता आ गहींर समझ राष्ट्रकेँ प्रेरित कयलक। हम हुनकर परिवारक प्रति अपन संवेदना व्यक्त करैत छी। हमर एकटा संरक्षक आ मार्गदर्शक चलि गेलाह। हमरामेसँ लाखो लोक जे हुनकर प्रशंसा करैत अछि ओ हुनका अत्यंत गर्वक संग याद करत।”
प्रियंका गाँधी सेहो एक्स पर पोस्ट कऽ डॉ. मनमोहन सिंहकेँ स्मरण कयलनि। ओ अपन पोस्टमे कहलीह, “डॉ. मनमोहन सिंह जकाँ बहुत कम लोककेँ सम्मान भेटैत अछि। हुनक ईमानदारी हमरा सभक लेल सदैव प्रेरणा रहत आ ओ सदैव ओहि लोकक बीच ठाढ़ रहताह जे एहि देशसँ सच्चा प्रेम करैत छथि, एकटा एहेन व्यक्तिक रूपमे जे अपन विरोधीक अवांछित आ गहन व्यक्तिगत हमलाक बावजूद देशक सेवा करबाक अपन प्रतिबद्धता पर अडिग रहलाह। ओ अन्त धरि वास्तवमे समतावादी, बुद्धिमान, दृढ़ इच्छाशक्ति आ साहसी छलाह। ओ राजनीतिक कठिन दुनियामे एकटा अद्वितीय, प्रतिष्ठित आ सज्जन छलाह।’
पूर्व प्रधानमंत्री मनमोहन सिंहक बृहस्पति दिन ९२ वर्षक आयुमे निधन भऽ गेलनि। बृहस्पतिक साँझ स्वास्थ्य अचानक बिगड़लाक बाद हुनका अस्पतालमे भर्ती कराओल गेल छल।
एकटा आधिकारिक बयानमे एम्स कहलक जे हुनका राति ८.०६ बजे एम्स चिकित्सा आपातकालमे भर्ती कयल गेल छल। एहिसँ पहिने हुनकर उम्रसँ सम्बन्धित बीमारीक इलाज चलि रहल छल आ अचानक घरमे बेहोश भऽ गेलाह। बृहस्पति राति ९.५१ बजे ओ अंतिम सांस लेलनि।
मनमोहन सिंह साल २००४ सँ २०१४ धरि दू बेर प्रधानमंत्री रहल छथि। हुनकर गिनती देशक पैघ अर्थशास्त्रीक रुपमे सेहो होइत अछि।
