पूर्णियाक बस स्टैण्ड पर ठाढ़ दूटा बसमे अचानक धुआँ निकलय लागल आ फेर आगि लागि गेल। कहल जाइत अछि जे आगि लागय केर पाछाँ एकटा धूम्रपान करयवला युवक छल, जे घटनास्थलसँ भागैत पकड़ल गेल।
जानकारीक अनुसार पूर्णियाक बस स्टैण्ड पर ठाढ़ बससँ अचानक धुआँ निकलय लागल। जाबति धरि लोक किछु बुझि सकलाह ताबत धरि लपट बसकेँ पूर्ण रूपसँ अपन चपेटमे लs लेने छल। आगि एतेक तेजीसँ पसरि गेल जे लगमे ठाढ़ एकटा आओर बस सेहो ओहि चपेटमे आबि गेल। मुदा, स्थानीय लोकसभ शेष बससभकेँ आगिसँ बचयबामे सफल रहलाह। घटनास्थल पर उपस्थित लोकक अनुसार, एकटा युवक बसमे धूम्रपान कऽ रहल छल। ओकर लापरवाहीके कारण बसमे आगि लागि गेल। युवककेँ बससँ भागैत देखल गेल, जकरा बसक कर्मचारी पकड़ि कऽ पीटि देलक।
अग्निशमन दलक टीम सूचना पर पहुँचल आ आगि बुझा देलक। मुदा, पहिल बस पूर्ण रूपसँ जरि कऽ राख भऽ गेल। दोसर बसके आंशिक क्षति भेल। स्थानीय निवासीक कहब छनि जे युवा सभ प्रायः बस स्टैण्ड पर खाली बसमे धूम्रपान करैत देखल जाइत अथि। ई घटना सुरक्षा व्यवस्था पर सवाल उठबैत अछि। लोक प्रशासनसँ सख्त कारवाईक मांग कयलक अछि। पुलिस एखन धरि एहि घटनाक संबंधमे कोनो आधिकारिक बयान जारी नहि कयने अछि। स्थानीय निवासी आ बस कर्मचारी एहि मामिलाक जाँच आ जिम्मेदार युवकक विरुद्ध कारवाईक माँग कयलनि अछि।
