मंगलकेँ मुख्यमंत्री नीतीश कुमारक अध्यक्षतामे भेल मंत्रिमंडलक बैसारमे 33 एजेंडाक मंजूरी देल गेल अछि। सबसँ पैघ राहत भूमि सर्वेक्षण केर देल गेल अछि। सरकार भूमि सर्वेक्षणक समय छह मास बढ़ा देलक अछि। आब अहाँकेँ सेल्फ-डिक्लेरेशन लेल १८० कार्य दिवस भेटत। रैयतकेँ दावाक लेल ६० कार्य दिवस आ दावाक निपटानक लेल ६० कार्य दिवस भेटत।
पटनामे सुपर स्पेशियलिटी नेत्र अस्पताल खोलल जायत। अस्पताल कंकड़बागमे १.६० एकड़ जमीन पर बनत। बिहार सरकार ९९ सालक लेल जमीन पट्टा पर देलक अछि। सुपर स्पेशियलिटी आई अस्पतालक नाम पर ‘शंकर नेत्रालय’क एकटा शाखा खोलल जायत। ढाई लाख टाकासँ कम आमदनी करयवला मरीजक मुफ्त इलाज कयल जायत।बाकी रोगीकेँ सब्सिडी देल जाएत। उपचार रियायती दर पर कयल जायत। ‘शंकर नेत्रालय’ द्वारा एकटा शिविर सेहो स्थापित कयल जायत। एकर अलावा प्रधानमंत्री आवास योजनाक तहत संविदा पर नियोजित श्रमिकक वेतनक रास्ता साफ कऽ देल गेल अछि।
सहरसाक मत्स्यगंधा झील आ ओकर लगपासक पर्यटन सुविधाक विकासक लेल राशि देल गेल अछि। ९८,६५,७९,३०० टाकाक प्रशासनिक स्वीकृति प्राप्त भेल अछि। संगहि कैमूरक करमचट इको-टूरिज्म आ एडवेंचर हबक विकासक लेल धनराशि देल गेल अछि। ४९ करोड़ ७३ लाख ३३ हजार ४४० टाकाक प्रशासनिक स्वीकृति भेटल अछि।
जय प्रकाश विश्वविद्यालय (छपरा) मे ०८ स्नातकोत्तर विभागमे ३२ पद जाहिमे २४ शिक्षण आ ०८ गैर-शिक्षण कर्मचारी पद सृजित करबाक स्वीकृति देल गेल अछि। भोला प्रसाद सिंह कॉलेज (भोरे, गोपालगंज) मे १४ शिक्षक आ १० गैर शिक्षण कर्मचारीकेँ २४ पद सृजित करबाक स्वीकृति देल गेल अछि।
एकर अलावा बीएमए कॉलेज बहेरीमे १२ शिक्षक आ मुरारका कॉलेज भागलपुरमे ०४ शिक्षक पदक स्वीकृति देल गेल अछि। अर्थात शिक्षकक कुल ५४ पद एवं शिक्षकेत्तर कर्मीक कुल १८ पद यानि कुल ७२ पदक सृजनक स्वीकृति कैबिनेटक बैसारमे कऽ देल गेल अछि।
