उत्तर प्रदेशक मुख्यमंत्री योगी आदित्यनाथ कहलनि अछि जे कोनो जाति, मत-मजहब वा सम्प्रदायसँ जुड़े ईष्ट देवी-देवता, महापुरुष वा सन्तक विरुद्ध अपमानजनक टिप्पणी अस्वीकार्य अछि, मुदा विरोधक नाम पर अराजकता सेहो बर्दाश्त नहिं कयल जायत।
पाबनि-तिहारकेँ देखैत मुख्य सचिव, डीजीपी, अपर मुख्य सचिव गृह आ अन्य विभागक वरिष्ठ अधिकारीक संग कानून व्यवस्थाक स्थितिक समीक्षा करैत मुख्यमंत्री कहलनि कि हर मत, संप्रदायक आस्थाक सम्मान होयबाक चाही। प्रत्येक नागरिकमे महापुरुषक प्रति कृतज्ञताक भावना होयबाक चाही, मुदा एकरा लेल बाध्य नहिं कयल जा सकैछ आ जबरदस्ती केकरो पर थोपल सेहो नहिं जा सकैत अछि।
मुख्यमंत्री कहलनि जे जँ कोनो व्यक्ति आस्थासँ खेलैत अछि, महापुरुष, देवता, देवी, सम्प्रदाय आदिक आस्थाक खिलाफ अभद्र टिप्पणी करैत अछि तऽ ओकरा कानूनक दायरामे आनि कठोर दंड देल जायत, मुदा सभ मत, मजहब, सम्प्रदायक लोककेँ एक दोसराक सम्मान करय पड़त।
मुख्यमंत्री कहलनि जे विरोधक नाम पर अराजकता, तोड़फोड़ वा आगजनी स्वीकार्य नहिं अछि, जे एहन दुस्साहस करत, ओकरा एकर दाम चुकयय पड़त।
मुख्यमंत्री पुलिस प्रशासनकेँ निर्देश देलनि कि हर जिला आ हर थानाकेँ ई सुनिश्चित करय पड़त जे शारदीय नवरात्रि विजयादशमीक पर्व हर्षोल्लास, शांति आ सौहार्दपूर्ण माहौलक बीच संपन्न होय। जे वातावरण खराब करैत अछि ओकरा चिन्हू आ सख्त कारवाई करू। जे कानूनक खिलाफ काज करैत अछि ओकरासँ सख्तीसँ निपटू।
महिला सुरक्षा सुनिश्चित करबाक निर्देश दैत मुख्यमंत्री कहलनि जे भीड़भाड़ वला क्षेत्रमे फुट पेट्रोलिंग आ पीआरवी ११२ केर पेट्रोलिंग तेज कयल जाय। ओ कहलनि जे महिला आ बेटीक सुरक्षा आ सुविधा सुनिश्चित कयल जाय, एकरा लेल सभ विभागकेँ मिलि कऽ काज करबाक चाही।
