रविदिन पटनाक सुल्तानगंज थाना क्षेत्रक रानी घाटक समीप शरारती तत्व शंकर वर्मा नामक एकटा व्यक्तिकेँ गोली मारि गंभीर रूपसँ घायल कऽ देलक। घायलकेँ इलाजक लेल एकटा निजी अस्पतालमे भर्ती कयल गेल। जतय डॉक्टर शंकर वर्माकेँ मृत घोषित कए देलक। एएसपी शरथ आरएस कहलनि जे शंकर वर्माक खिलाफ सुल्तानगंज आ अन्य थानामे १८ टा आपराधिक मामला दर्ज अछि। प्रथम दृष्टया, एहेन प्रतीत होइत अछि जे गोलीबारी आपसी प्रतिद्वंद्वितामे कयल गेल अछि। पुलिस जांच कए रहल अछि। ओतहि राजधानी पटनाक शहरी क्षेत्रमे पिछला लगातार ५ दिनमे हत्याक चारिटा घटना भेल अछि। एहिसँ नीतीश प्रशासन पर सवाल उठि रहल अछि।
पुलिसक अनुसार, ई घटना आइ भोर ९ बजे रानी घाटक समीप भेल। सीसीटीवी फुटेज सामने आयल अछि जाहिमे चारि गोटे घटनाकेँ अंजाम देलाक बाद भागैत देखल जा रहल अछि। मृतकक माता सोना देवी कहलनि जे शंकर वर्माक मुख्य नाम शंकर प्रसाद अछि। आब लोक हुनका शंकर वर्मा कहय लागल छल। ओ ठेकेदारीक काज करैत छल। रविदिन ओ गंगाक कातमे रानी घाटक एकटा कोनमे ठाढ़ छल तखन चारिटा उपद्रवी आबि शंकरकेँ गोली मारि हत्या कऽ देलक। मृतकक परिवार बेचैनीसँ कानि रहल अछि।
पुलिस कहैत अछि जे मृतकक आपराधिक इतिहास अछि, मुदा आइ जाहि तरहें ई घटना दिनदेखारे कयल गेल अछि, आब ई स्पष्ट भऽ गेल अछि जे उपद्रवी सभमे पुलिसक भय समाप्त भऽ चुकल अछि। राजधानी पटनाक शहरी क्षेत्रमे पछिला लगातार पाँच दिनमे चारिटा हत्याक घटना भेल अछि।
पिछला पाँच दिनक घटनामे भाजपा नेता आ दुग्ध संचालक अजय शाहक १३ अगस्तकेँ राति १० बजे आलमगंज थाना क्षेत्रमे गोली मारि हत्या कऽ देल गेल छल। १५ अगस्तकेँ साँझ ७ बजे सुल्तानगंज थाना क्षेत्रक पत्थरक मस्जिद लग राजू नामक २२ वर्षीय व्यक्तिक गोली मारि हत्या कऽ देल गेल। १६ अगस्तक साँझ दानापुरक सगुना मोड़ लग सीतामढ़ीक रामजी रायकेँ गोली मारि हत्या कऽ देल गेल। शनि दिन पटना शांत रहल, मुदा हत्याक घटना रविदिन भोरे-भोर भेल।
