सदनक नेता जेपी नड्डा कहलनि अछि जे विनेश फोगाट मामिलामे विपक्ष जाहि तरहक व्यवहार कयलक अछि ओहिसँ संसदीय मर्यादाक उल्लंघन भेल अछि।
वास्तवमे बृहस्पति दिन विपक्षी सांसद विनेश फोगाटकेँ ओलम्पिकसँ अयोग्य ठहरयबाक मुद्दा राज्यसभामे उठाबय चाहैत छलाह। राज्यसभामे प्रतिपक्षक नेता मल्लिकार्जुन खड़गे एहि मुद्दा पर अपन बात राखय चाहैत छलाह। मुदा विपक्षकेँ एकरा लेल अनुमति नहिं भेटल।
एकर बाद विपक्षी सांसदसभ सदनमे हंगामा कयलनि। हंगामाक बाद सदनक नेता जेपी नड्डा कहलनि जे लोकतंत्रमे सभकेँ बजबाक अधिकार अछि, मुदा लोकतंत्र सेहो एकटा व्यवस्थाक अनुसार चलैत अछि।
नड्डा कहलनि जे कांग्रेस आ तृणमूल कांग्रेस कुर्सीक प्रति जाहि तरहक व्यवहार कयलक अछि ओ निन्दनीय अछि। जतय धरि विनेश फोगाटक सवाल अछि, ई कोनो दल वा विपक्षक प्रश्न नहिं अछि, ई देशक प्रश्न अछि। पूरा देश ओकर संग ठाढ़ अछि। ई खेलकेँ आगू बढ़यबाक विषयमे अछि, जाहिमे सभगोटे भावनात्मक रूपसँ जुड़ल अछि आ विनेशक सङ्ग ठाढ़ अछि।
प्रधानमंत्री विनेशक विषयमे कहलनि जे ओ ‘चैंपियन ऑफ चैंपियन्स’ छथि। प्रधानमंत्री कहलखिन कि पूरा देश हुनका संग ठाढ़ अछि। पूरा देशकेँ लगैत अछि जे प्रधानमंत्रीक आवाज १४० करोड़ भारतीयक आवाज अछि।
ओ कहलनि जे ई दुर्भाग्यपूर्ण अछि जे हम एकरा दल आ विपक्षमे विभाजित करबाक प्रयास करैत छी। हमरा लगैत अछि जे शायद विपक्ष विषयहीन भए गेल अछि। जखन पूरा देश विनेश फोगाटक संग ठाढ़ अछि, भारत सरकार, खेल मंत्रालय आ भारतीय ओलम्पिक संघ एहि सभकेँ सुलझायबाक प्रयास कयलक अछि।
संगहि सभापति जगदीप धनखड़ कहलनि जे एहि पवित्र सदनकेँ अराजकताक केन्द्र बनायब, भारतीय लोकतंत्र पर हमला करब, अध्यक्षक गरिमाकेँ धूमिल करब, शारीरिक रूपसँ चुनौतीपूर्ण वातावरण बनेनाइ अमर्यादित आचरण नहिं अछि, ई एकटा एहेन आचरण अछि जे हर सीमा पार करैत अछि।
सभापति कहलनि जे ई सदन वर्तमानमे देशक सत्तारूढ़ दलक अध्यक्षकेँ सदनक नेताक रूपमे देखि रहल अछि। ई सदन एखनि विपक्षी दलक राष्ट्रीय अध्यक्षक उपस्थितिकेँ प्रतिपक्षक नेताक रूपमे देखि रहल अछि।किछु सांसदक व्यवहारक संबंधमे ओ कहलनि जे ई चुनौती हमरा नहिं बल्कि सभापति पदकेँ देल जा रहल अछि। ई चुनौती एहि लेल देल जा रहल अछि किएक तँ हुनका लगैत अछि कि जे व्यक्ति एहि पद पर बैसल छथि ओ एकर योग्य नहिं छथि। सभापति कहलनि जे हम एहि प्रयासमे कोनो कसरि नहिं छोड़लहुँ, मुदा हमरा सदनक सहयोग ओतेक नहिं भेटल जतेक हमरा आवश्यकता छल।
