भारत एकटा पैघ कूटनीतिक जीत प्राप्त कयलक अछि। कतरक जेलमे बंद भारतीय नौसेनाक दिग्गजकेँ रिहा कऽ देल गेल अछि। ई ८ पूर्व भारतीय नौसैनिककेँ १८ मासक बाद कतर जेलसँ रिहा कऽ देल गेल अछि।
किछु मास पहिने, एहि पूर्व नौसेनासभकेँ मृत्युदण्डक सजा देल गेल छल। भारत सरकारक प्रयासक बाद हुनकर सजाकेँ ‘कारावास’मे बदलि देल गेल आ आब हुनका सभकेँ रिहा कऽ देल गेल अछि।
एहि संबंधमे विदेश मंत्रालय सोमदिन एकटा बयान जारी कऽ कहलक जे एहि ८ मे सँ ७ गोटे भारत घुरि आयल छथि।
उल्लेखनीय अछि जे पहिने भारत सरकारक प्रयाससँ एहि साल जनवरीमे एहि पूर्व सैनिकक मृत्युदण्डकेँ अलग-अलग अवधिक कारावासमे बदलि देल गेल छल।
विदेश मंत्रालय बयान जारी कय कहलक “भारत सरकार एहि आठ भारतीय नागरिकक रिहाईक स्वागत करैत अछि जे दाहरा ग्लोबल कम्पनीक लेल काज कऽ रहल छल आ कतरमे नजरबन्दमे छल। आठमे सँ सात गोटे भारत घुरि आयल छथि। हम कतरक अमीर द्वारा एहि नागरिकसभक रिहाई आ ओकर घर वापसीक संबंधमे लेल गेल निर्णयक स्वागत करैत छी।”
ई आठ भारतीय कतरमे स्थित एकटा निजी सुरक्षा कंपनी अल दहराक कर्मचारी छलाह। कथित जासूसीक आरोपमे कतर द्वारा हुनका लोकनिकेँ २६ अक्टूबरकेँ मृत्युदण्डक सजा सुनाओल गेल छल। नौसेना प्रमुख तखनि कहने छलाह जे केंद्र सरकार आठटा कर्मीक मदति लेल हरसंभव प्रयास कऽ रहल अछि।
भारतीय नौसेना कहलक जे केंद्र सरकार द्वारा ई सुनिश्चित करबाक हरसंभव प्रयास कयल जा रहल अछि जे एहि आठ गोटेकेँ राहत भेटय।
विदेश मंत्री एस जयशंकर सेहो एहि सब पूर्व नौसैनिक परिवारसँ भेंट कयलनि। ओ कहलनि जे सरकार एहि मामिलाकेँ सबसँ बेसी महत्व दैत अछि। परिवारक चिंता आ दर्द बुझैत अछि। संगहि, भारत सरकार हुनकालोकनिक रिहाई सुनिश्चित करबाक लेल हरसंभव प्रयास कऽ रहल अछि।
