घटना संदेहास्पद स्थितिमे 37 वर्षीय ग्रामीण चिकित्सकक मृत्यु भेल Maithil Punarjagran Prakash January 10, 2024January 10, 2024 0 Comments बेनीपुर समदिया * बहेड़ा थाना क्षेत्रक त्रिमुहानी गामक पीतांबर यादवक 37 वर्षीय बेटा ग्रामीण चिकित्सक कैलाश यादवक मृत्यु बीतल राइत संदेहास्पद स्थितिमे भऽ गेल । मृतकक लहास बहेड़ी थाना क्षेत्रक कोपी मुसहरी सड़कक कातमे गुड़कल भेटल। मृतकक बड़का भाई राजेंद्र यादव बतेलनि जे मृतक रातिमे फटफटिया संग निकलल छल ।देर राइत धरि घर वापिस नहिं आयल । परिवारक लोक सभ खूब खोजबीन कयलक मुदा ओकर कोनो अता-पता नहिं चलल । मोबाइल स्विच बंद छल । भोरमे ग्रामीण सड़कक कातमे कैलाश यादवकेँ फटफटिया संग गीरल देखलनि। ओ मरि गेल छल। मृतक कैलाशक परिजन बतेलनि जे ओकर हत्या कय सड़कक कातमे फेंक देल गेल। त्रिमुहानी कमला नदीक ओहि पार कोपी मुसहरी गाम अछि जे बहेड़ी थाना क्षेत्रमे अछि । घटनाक जानकारी भेटतहि परिवारक लोकक संग भारी भीड़ उमड़ि पड़ल । ग्रामीण सभ घटनाक जानकारी बहेड़ी थानाकेँ देलन्हि। थाना पुलिस लहास केर कब्जामे लऽ पोस्टमॉर्टम लेल डीएमसीएच पठा देलनि । ग्रामीण सभ बहेड़ा बहेड़ी मुख्य सड़क केर घंटो जाम कय पुलिसक विरुद्ध नाराबाजी करैत रहलाह। मृतकक दू टा पुत्री एवं एकटा पुत्रक अलावा हुनक पत्नी बेसहारा भऽ गेल। पुरा परिवारक कानि-कानि कय हाल बेहाल अछि । Spread the love
