लोकसभा चुनाव २०२४ केर राजनीतिक युद्धक बीच कर वंचनाक दंगल चलि रहल अछि। आयकर विभाग कांग्रेसकेँ नोटिस पर नोटिस दऽ रहल अछि आ कांग्रेस एक्कौहटा नोटिसक जवाब नहिं दऽ पाबि रहल अछि। आयकर विभाग पर कांग्रेस पार्टीक कर, ब्याज आ दंडक रूपमे ३५६७ करोड़ टाका बकाया भऽ गेल अछि।
आयकर विभाग भारतक सबसँ पुरान पार्टी कांग्रेसक नींव हिला देलक अछि। लोकसभा चुनाव २०२४सँ पहिने आयकर विभाग कांग्रेसक सभ लेनदेनमे कर वंचनाक पुनर्मूल्यांकन कयलक। एकर बाद पहिल नोटिस जारी कयल गेल आ १७०० करोड़ टाकाक कर, ब्याज आ जुर्माना लगाओल गेल। कांग्रेस एहि नोटिस पर कार्रवाई करैत कि पुनः आयकर विभाग ३० मार्चकेँ १८६७ करोड़ टाकाक तीनटा नोटिस देलक।
कांग्रेस पार्टी एहि मामिलाकेँ अदालतमे लऽ गेल छल, मुदा अदालत सेहो कांग्रेसकेँ कोनो राहत देबासँ मना कऽ देलक अछि। कांग्रेस एहि मामिलामे आक्रामक अछि। आयकर नोटिसक विरोधमे देश भरिमे विरोध प्रदर्शन कयल गेल आ कहल गेल जे ई भाजपाक अहंकार अछि। कांग्रेसक महासचिव जयराम रमेश कहलनि जे सरकार कर आतंकवाद पसारि रहल अछि। हम एहि आतंकवादसँ नहिं डरैत छी।
आयकर विभाग एकटा आओर मामिलामे १३५ करोड़ टाकाक नोटिस जारी कयने छल। कांग्रेस पार्टी एकर विरुद्ध सर्वोच्च न्यायालयमे गेल, मुदा एखन धरि एतयसँ कोनो राहत नहिं भेटल अछि। पार्टीक खाता पहिनेसँ सील अछि। कांग्रेस पार्टी लगातार एकर विरोध कए रहल अछि।
कांग्रेसक आरोप पर भाजपा प्रतिक्रिया देलक अछि। भाजपा कहलक अछि जे ई कांग्रेसक अहंकार अछि। की विपक्षी दलक लेल एकटा अलग कानून हेबाक चाही ? करमे हेरफेर केलाक बाद कांग्रेस आब जनताकेँ सेहो गुमराह करबामे लागल अछि।
