राज्यमे लगातार मानसूनक बरखाक बीच शुक्रदिन ११ जिलामे बिजली गिरलासँ १७ लोकक मृत्यु भऽ गेल। एहिमे जहानाबाद मखदुमपुर थाना क्षेत्रक पुन्हादा पंचायतक गंगा बिगहामे एके ठाम एकटा नेवारी व्यापारी सहित तीन भाइ आ नालंदाक इस्लामपुरक सकरी गाममे खेती करयवला दूटा सहोदर भाई शामिल छथि। एकर अतिरिक्त बेगूसराय जिलामे तीन, वैशाली जिलामे दूटा आ सहरसा, मधेपुरा, पूर्वी चम्पारण, रोहतास, अरवल, पूर्णिया आ सारणमे एक-एक गोटेक मृत्यु भेल अछि। मृतकक पहिचान गया जिलाक बेला थाना क्षेत्रक सलेमपुरक बलम यादव, मखदुमपुरक गंगा बिगहाक निवासी भूषण यादव आ प्रमोद यादवक भेल अछि। व्यापारी दुनू गामक लोकक मदतिसँ नेवारी कीनि ठेलापर लऽ रहल छल। एम्हर बरखा होबय लागल, तीनू गोटे भीजि जयबासँ बचबाक लेल नेवारीक किरणक नीचा नुका गेल छल, मुदा वज्रपातक कारण तीनू गोटे मरि गेल।
नालन्दा जिलाक इस्लामपुर थाना क्षेत्रक सकरी गाममे बिजली गिरलासँ दूटा भाय, ४६ वर्षीय बिरजू महतो आ ४० वर्षीय विनोद महतोक मृत्यु भऽ गेल। ओतहि वैशाली जिलाक पातेपुर थाना क्षेत्रक नीरपुर कुसाही गाममे धान उखाड़ैत काल बिजली गिरलासँ कमलेश रायक पत्नी ३५ वर्षीय रीता देवीक मृत्यु भऽ गेल, जखन कि कमलेश घायल भऽ गेल। पंचायत समितिक पूर्व सदस्य ६४ वर्षीया लालो देवीक मृत्यु चेहराकला प्रखंडक बिशुनपुर अर्रा गामक चँवरमे घास काटैत काल भऽ गेलनि। बेगूसरायमे बिजली गिरलासँ एकटा किशोर सहित तीनटा लोकक मृत्यु भऽ गेल। एहिमे डंडारी थाना क्षेत्रक तेतरी गामक बहियारमे खेतमे काज करैवला एकटा बुजुर्ग महिला सम्मिलित छथि।
रोहतासक काराकाटमे एकटा किशोर, अरवलक चौरम थानाक शेखपुरामे एकटा वृद्ध व्यक्ति आ सारनक बनियापुरक कराह वृत्ति टोलामे एकटा अधेड़ व्यक्तिक मृत्यु भऽ गेल।
सहरसाक पतरघट थाना क्षेत्रक गोलमा पूर्व पंचायतक सखोडी वार्ड ७ निवासी दुखा दासक पुत्र कुश कुमार (१५), मधेपुराक गम्हरिया प्रखण्डक बभनीक मदन यादव (४०) आ पूर्णियाक कोहिला पंचायतक शीला देवी (५०) क बिजली गिरलासँ मृत्यु भऽ गेल। पूर्वी चम्पारणक पताही थाना क्षेत्रक बोकाने कला पंचायतक चामुंटोला गाममे खेतमे काज करबाक लेल गेल ४० वर्षीय किसान अरविन्द रायक बिजली गिरलासँ मृत्यु भऽ गेल।
