उत्तर प्रदेशक ‘संगम नगरी’ प्रयागराजमे मौनी अमावस्या पर शुक्रदिन दुपहरिया १२ बजे धरि लगभग १.४० करोड़ लोक गंगामे स्नान कयलनि। एकटा अधिकारी इ जानकारी देलनि। एम्हर स्नान करयवला भक्तसभ पर हेलीकॉप्टरसँ पुष्पक बरखा सेहो कयल गेल। माघ मेला प्रशासनक एकटा अधिकारी कहलनि जे शुक्रदिन दुपहरिया १२ बजे धरि लगभग १.४० करोड़ लोक गंगा आ संगममे स्नान कयलनि। एम्हर हेलीकॉप्टरसँ स्नान कयनिहार भक्तसभ पर फूलक वर्षा कयल गेल।
ओ कहलनि जे बृहस्पति दिन मध्यरात्रि १२ बजेसँ भीड़ घाट दिस दौड़ि रहल अछि आ गाम, देहात क्षेत्र आ अन्य जिलासँ श्रद्धालु एतय पहुँचि रहल छथि। अधिकारी कहलनि जे भारी भीड़केँ देखैत घाटक लम्बाई ६,८०० फीटसँ बढ़ाकऽ ८,००० फीट कऽ देल गेल अछि आ कुल १२ घाटक निर्माण कयल गेल अछि आ सभ घाटपर पर्याप्त संख्यामे वस्त्र बदलबाक सुविधा स्थापित कयल गेल अछि।
पुलिस उपमहानिरीक्षक (माघ मेला) राजीव नारायण मिश्र कहलनि जे मेला क्षेत्रमे सुरक्षाक व्यापक प्रबन्ध कयल गेल अछि आ पूरा क्षेत्रमे ३०० सँ बेसी सीसीटीवी कैमरा आ कतेको एआई आधारित कैमरा कार्यरत अछि। ओ कहलनि जे एहि कैमरासँ फीडकेँ इंटीग्रेटेड कमांड कंट्रोल सेंटर पर लेल जा रहल अछि।
अधिकारी कहलनि जे मेला क्षेत्रमे यदि कोनो संदिग्ध वस्तु वा व्यक्ति देखल जाइत अछि तँ तत्काल कार्रवाई कयल जा रहल अछि। आतंकवाद-रोधी दस्ता (एटीएस), द्रुत कार्य बल (आरएएफ), राज्य आपदा मोचन बल (एसडीआरएफ), राष्ट्रीय आपदा मोचन बल (एनडीआरएफ) टीम, महिला पुलिसकर्मी, घुड़सवार पुलिस, बम निरोधक दस्ता सब क्रियाशील अछि।
