पैक्स अध्यक्ष कहलनि जे हम सब कुशवाहा समाजक लोक मर्यादा पुरुषोत्तम श्रीरामक पुत्र कुशक वंशज छी। अयोध्यासँ आयल मिथिलाक लोकसभक हम अपन भूमि पर स्वागत करैत छी।
कुशवाहा कहलनि जे हम अहाँक संकल्पक समर्थन करैत कहय चाहब जे पुनौराधाम सीतामढ़ीक भव्य विकास होय आ सीता माताक भव्य, नव्य आ दिव्य मंदिरक निर्माण होय, एहिमें बालिका स्वरूप प्रतिमाक प्राण प्रतिष्ठा कयल जाए।
एहि अवसर पर वक्ता लोकनि अवध आ मिथिलाक बीच त्रेतायुगीन मैत्रीपूर्ण संबंधकेँ प्रगाढ़ बनेबाक संग सीता माताक बालस्वरूप वाला भव्य मन्दिर पुनौराधाममे निर्माणक लेल अभियान आरंभ करबाक जोरदार समर्थन कयलनि।
एहि अवसर पर बिन्दुसारक शिव मन्दिर परिसरमे आयोजित समारोहकेँ संबोधित करैत जनजागृति मंच दिल्लीक अध्यक्ष के एन झा कहलनि जे जेना अयोध्यामे श्रीरामक जन्मभूमि अछि तहिना सीतामढ़ी बिहारमे सीतामाता प्राकट्य धाम अछि। हमरा सबके अपन जीवनमे बेर-बेर एहि दुनू स्थानक यात्रा करबाक चाही।
मन्दिरमे सम्मेलनक बाद जानकी ज्योति जागृति यात्रा एकटा शोभायात्राक रूपमें आगाँ बरौली दिस बढ़ि गेल, जतय आइ रात्रि विश्राम अछि। शोभायात्रामे बिन्दुसारक धर्मेन्द्र कुमार सिंह, आस्तिक कुमार, राहुल, चन्दन सिंह, राज कुमार, आलोक कुमार आ पैक्स अध्यक्ष सुबाष कुशवाहाक संग अनेक स्थानीय लोग सम्मिलित भेलाह।
जानकी ज्योति यात्रामे जनजागृति मंच दिल्लीक अध्यक्ष के एन झा, उपाध्यक्ष डाक्टर प्रदीप कुमार झा, सतीश चौहान, भरत भैया, नन्द किशोर महतो, डिलन सिंह, किशन आ मनोज पाठक सम्मिलित भेलाह।
