यूपीमे भाजपा केर चुनावी तैयारी तेज, विनोद तावड़ेक मुख्यमंत्री योगीसँ भेट

लखनऊ । समदिया

उत्तर प्रदेशमे 2027 केर विधानसभा चुनावक तैयारीकेँ लऽ कऽ भाजपा संगठन आ सरकारक बीच समन्वय मजबूत करबाक प्रयास तेज कऽ देने अछि। एहि क्रममे भाजपा केर राष्ट्रीय महामंत्री आ उत्तर प्रदेश प्रभारी विनोद तावड़े रविदिन मुख्यमंत्री योगी आदित्यनाथसँ हुनकर सरकारी आवास 5-कालिदास मार्ग पर भेंट कयलनि।

भेटक दौरान संगठन, सरकार आ आगामी विधानसभा चुनावसँ जुड़ल विभिन्न मुद्दापर विस्तारसँ चर्चा भेल। एहि अवसरपर भाजपा केर राष्ट्रीय मंत्री आ उत्तर प्रदेशक सह-प्रभारी जगदीश ईश्वरभाई पटेल सेहो उपस्थित छलाह।

तावड़े उत्तर प्रदेशक प्रभारी बनलाक बाद पहिल बेर लखनऊ पहुँचल छथि। शनिदिन ओ प्रदेश भाजपा अध्यक्ष पंकज चौधरी आ प्रदेश महामंत्री संगठन धर्मपाल सिंहक संग बैठक कऽ चुनावी तैयारीक समीक्षा कयने छलाह। बैठकमे बूथ स्तरपर संगठन मजबूत करब, युवासभकेँ पार्टीसँ जोड़ब आ कार्यकर्तासभकेँ चुनाव लेल सक्रिय करबाक मुद्दापर चर्चा भेल।

तावड़े सोशल मीडिया पोस्टमे कहलनि जे भाजपा 2027 केर विधानसभा चुनावमे एनडीएकेँ लगातार तेसर बेर सरकार बनेबाक लक्ष्यसँ आगाँ बढ़ि रहल अछि। हुनकर अनुसार प्रधानमंत्री नरेंद्र मोदीक नेतृत्व आ मुख्यमंत्री योगी आदित्यनाथक सरकारक विकास कार्यक आधारपर पार्टी चुनावी तैयारी करि रहल अछि।

लखनऊ पहुँचला पर तावड़ेक प्रदेश भाजपा अध्यक्ष पंकज चौधरी सहित पार्टीक वरिष्ठ नेता आ पदाधिकारी स्वागत कयलनि। भाजपा अध्यक्ष नितिन नवीन 18 अगस्तकेँ विनोद तावड़ेक उत्तर प्रदेशक प्रभारी नियुक्त कयने छलाह। जगदीश ईश्वरभाई पटेलकेँ सह-प्रभारीक जिम्मेदारी देल गेल अछि।

तावड़े एकर पहिने हरियाणा आ बिहारक प्रभारीक जिम्मेदारी सेहो सम्हारि चुकल छथि। 2025 केर बिहार विधानसभा चुनावक समय सेहो ओ भाजपा केर प्रभारी छलाह। आब यूपीमे हुनकर प्रमुख चुनौती संगठनकेँ बूथ स्तरपर सक्रिय करब आ 2027 केर चुनाव लेल पार्टीक रणनीतिक तैयारीकेँ गति देब अछि।