बख्तियारपुरक नाम बदलि ‘नीतीशपुर’ करबाक मांग, संतोष सुमनक प्रस्ताव

पटना । समदिया

बिहारमे बख्तियारपुरक नाम परिवर्तनकेँ लऽ कऽ राजनीतिक चर्चा तेज भऽ गेल अछि। मुख्यमंत्री सम्राट चौधरी एकटा मीडिया साक्षात्कारमे कहलनि जे बख्तियारपुरक नाम बदलल जाएबाक चाही। हुनकर एहि बयानक बाद सरकारमे सहयोगी हिंदुस्तानी आवाम मोर्चा (HAM) कऽ राष्ट्रीय अध्यक्ष आ मंत्री संतोष कुमार सुमन बख्तियारपुरक नव नाम ‘नीतीशपुर’ रखबाक मांग केलनि।

मुख्यमंत्री सम्राट चौधरी कहलनि जे बख्तियार खिलजीक नाम पर कोनो शहरक नाम रहब उचित नहि अछि। इतिहासमे बख्तियार खिलजी द्वारा नालंदा सहित अन्य स्थानपर अराजकता आ विनाशक घटनाक उल्लेख भेटैत अछि। हालांकि मुख्यमंत्री ईहो स्पष्ट केलनि जे बख्तियारपुरक नाम बदलबाक औपचारिक प्रक्रिया चलि रहल अछि वा नहि, एहि संबंधमे हुनका तत्काल जानकारी नहि अछि।

एहि बीच संतोष कुमार सुमन कहलनि जे बख्तियारपुर केवल एकटा भौगोलिक पहिचान नहि, बल्कि बिहारक पूर्व मुख्यमंत्री नीतीश कुमारक जन्मभूमि अछि। हुनकर कहब अछि जे नीतीश कुमार अपन दीर्घ सार्वजनिक जीवनमे बिहारक राजनीति, विकास आ शासनकेँ नब दिशा देलनि।

सुमन कहलनि जे एहेन जननेताक जन्मभूमिकेँ हुनकर नामसँ सम्मानित करब केवल नाम परिवर्तन नहि, बल्कि एहि धरतीक गौरव, इतिहास आ जनभावनाक सम्मान होयत।

ओ मुख्यमंत्री सम्राट चौधरीक समक्ष प्रस्ताव रखैत कहलनि जे ‘बख्तियारपुर’क नाम बदलि ‘नीतीशपुर’ कएल जाए। हुनकर तर्क अछि जे जाहि धरती बिहारकेँ नीतीश कुमार सन जननेता देलक, तकर पहिचान सेहो हुनकर नामसँ जुड़बाक चाही।