नव सरकार पूर्व डिप्टी सीएमक फैसलाकेँ पलटैत 224 राजस्व कर्मचारीक निलंबन कयलक समाप्त

पटना। समदिया

बिहारमे नव सरकार पूर्व डिप्टी सीएम विजय सिन्हाक एकटा पैघ फैसलाकेँ उलट देलक अछि। राज्यमे 224 राजस्व कर्मचारीक निलंबन समाप्त करबाक आदेश जारी कैल गेल अछि।

बिहारक मुख्यमंत्री पद ग्रहणक बादसँ सम्राट चौधरी लगातार एक्शन मोडमे छथि। नव सरकार आब पूर्व डिप्टी सीएम विजय सिन्हाक पैघ फैसलाकेँ उलट देलक अछि। पिछला ढाई महीनासँ अपन मांग कए ल कय हड़ताल पर बैसल आ निलंबित कयल गेल राजस्व कर्मचारीक निलंबन आब समाप्त हेबाक अछि। खबरि केर अनुसार नव सरकार 224 राजस्व कर्मचारीक निलंबनकेँ समाप्त करय केर आदेश जारी कय पूर्व डिप्टी सीएम विजय सिन्हाक फैसलाकेँ उलट देलक अछि।

बिहारक राजस्व आ भूमि सुधार विभागक अपर सचिव महेन्द्र पाल सभ जिला मजिस्ट्रेटकेँ पत्र लिखि 11 फरवरीसँ 19 अप्रैल केर बीच निलंबित सभ कर्मचारीक संबंधमे आवश्यक कार्यवाही करबाक निर्देश देलनि अछि। दरअसल राजस्व कर्मचारीक हड़तालसँ क्षेत्रमे काज बाधित भ रहल छल आ आब जनगणनासँ जुड़ल काज शुरू भ गेल अछि।

जनतब देब जे पूर्व डिप्टी सीएम विजय सिन्हा राजस्व आ भूमि सुधार विभागमे सुधार लेल कतेको मजबूत कदम उठौने छलाह, जकर विरोध कर्मचारी संघ कयलक आ बादमे हड़ताल कय देलक। एहि दौरान राज्यमे 200 सँ बेसी राजस्व कर्मचारीकेँ निलंबित कय देल गेल। सम्प्रति राजस्व आ भूमि सुधार विभाग सीएम सम्राट चौधरीक हाथमे अछि।

मुदा सीओ आ राजस्व अधिकारीक समस्या कम नहि भेल अछि। बहुतो अधिकारी एखनो हड़ताल पर छथि। 9 मार्चसँ हड़ताल पर बैसल एहि अधिकारी सभकेँ विभागक दिससँ कतेको बेर चेतावनी देल गेल अछि। किछु अधिकारी काज पर वापस आबि गेल छथि, मुदा 45 सँ बेसी आरओ आ सीओ निलंबित छथि।