समय पर पंचायत चुनाव कराबै लेल पटना हाईकोर्टमे याचिका

पटना । समदिया

बिहारमे पंचायत चुनाव समय पर कराबै लेल पटना हाईकोर्टमे याचिका दायर कएल गेल अछि। याचिकाक सुनवाइ करैत न्यायमूर्ति ए. अभिषेक रेड्डीक एकलपीठ राज्य सरकार आ राज्य निर्वाचन आयोगसँ स्थिति स्पष्ट करैत जबाबी हलफनामा दाखिल करबाक निर्देश देने अछि।

कार्यकाल पूरा होयसँ पहिने चुनावक मांग

मोहन प्रसाद चौरसिया एवं अन्यक तरफसँ दायर याचिकामे कहल गेल अछि जे पंचायती राज संस्थाक कार्यकाल पूरा होयसँ पहिने निर्वाचन आयोग द्वारा चुनावक घोषणा कएल जाए। याचिकाकर्ताक अधिवक्ता एसबीके मंगलम आ अवनीश कोर्टमे कहलनि जे संवैधानिक प्रावधानक अनुसार पंचायत चुनावमे अनावश्यक देरी नहि होबाक चाही।

याचिकाकर्ताक अनुसार राज्य सरकार आ निर्वाचन आयोग वर्तमानमे बाढ़िक स्थिति देखबैत समय पर चुनावक घोषणा नहि कऽ रहल अछि। मुदा, सुप्रीम कोर्टक निर्देश आ संवैधानिक प्रावधानक अनदेखी नहि कएल जा सकैत अछि।

परिसीमनक कारण चुनावमे देरीक आशंका

पंचायत चुनावसँ पहिने परिसीमनक प्रक्रिया होयबाक अछि। एहि कारण एहि वर्ष चुनाव होयबाक संभावना कम मानल जा रहल अछि। पिछला पंचायत चुनाव 2021 मे सितंबरसँ दिसंबरक बीच भेल छल। आब चुनाव 2027 मे होयबाक संभावना व्यक्त कएल जा रहल अछि। परिसीमनक लेल पंचायती राज विभाग हालहिमे तीन करोड़ टकाक राशि जारी कएने अछि। आब हाईकोर्टमे सरकार आ निर्वाचन आयोगक जवाब पर सभक नजरि अछि।