शरद यादव, रघुवंश प्रसाद आ रामविलास पासवानक प्रतिमा लगाबय केर तेजस्वीक मांग
पटना । समदिया
बिहार विधानसभामे नेता प्रतिपक्ष तेजस्वी प्रसाद यादव मुख्यमंत्री सम्राट चौधरीकेँ पत्र लिखि पूर्व केंद्रीय मंत्री स्वर्गीय शरद यादव, डॉ. रघुवंश प्रसाद सिंह आ रामविलास पासवानक आदमकद प्रतिमा राज्यक विभिन्न स्थान पर स्थापित करबाक मांग केलनि अछि। संगहि तीनू नेताक जयंती अथवा पुण्यतिथिकेँ राजकीय समारोहक रूपमे मनाबयक आग्रह केलनि।
तेजस्वी कहलनि जे तीनू नेताक सामाजिक सरोकार आ सक्रिय राजनीतिक जीवन बिहारक लेल महत्वपूर्ण रहल अछि। हुनकर योगदानसँ राज्यक लोक सदैव प्रेरणा लैत रहत।
पत्रमे डॉ. रघुवंश प्रसाद सिंहक अंतिम इच्छाक सेहो उल्लेख करैत तेजस्वी कहलनि जे निधनसँ किछु दिन पहिने ओ तत्कालीन मुख्यमंत्रीकेँ पत्र लिखि किछु मांग रखने छलाह। करीब छह वर्ष बीति गेलाक बादो एहि दिशामे सकारात्मक पहल नहि भेल अछि। तेजस्वी मुख्यमंत्रीसँ हुनकर अंतिम इच्छाक सम्मान करैत आवश्यक कदम उठेबाक आग्रह केलनि।
ओ शरद यादवक सामाजिक न्यायक राजनीति आ वंचित-पिछड़ल वर्गक उत्थानमे योगदान तथा रामविलास पासवानक सामाजिक न्याय, समतामूलक विकास आ वंचित वर्गक अधिकार लेल कएल गेल कार्यकेँ सेहो रेखांकित केलनि।
तेजस्वी कहलनि जे एहि तीनू वरिष्ठ नेताकेँ सम्मान देब बिहारक प्रति हुनकर योगदानक सच्चा श्रद्धांजलि होयत।
