यूएनजीएमे नेतन्याहूक भाषण पर हंगामा, 75 देशक प्रतिनिधि कयलनि वॉकआउट
नई दिल्ली । समदिया
संयुक्त राष्ट्र महासभा (यूएनजीए) केर बैठकमे बृहस्पति दिन इस्राइलक प्रधानमंत्री बेंजामिन नेतन्याहूक भाषणक समय भारी विरोध देखबाक लेल भेटल। नेतन्याहू मंच पर पहुंचिते करीब 75 देशक प्रतिनिधि सभागारसँ बाहर निकलि गेलाह। लगभग तीन मिनट धरि हंगामा आ वॉकआउटक बाद नेतन्याहू भाषण शुरू केलनि।
नेतन्याहू वॉकआउट करनिहार प्रतिनिधि सभकेँ ‘नैतिक रूपसँ कायर’ कहैत व्यंग्य कयलनि। फलस्तीन मिशन पहिनेसँ 193 सदस्य देशक प्रतिनिधि सभसँ नेतन्याहूक भाषणक समय सभागार छोड़बाक अपील केने छल।
गाजामे नरसंहारक आरोप खारिज
नेतन्याहू गाजामे इस्राइल पर लगाओल जा रहल नरसंहारक आरोपकेँ खारिज करैत एकरा ‘सदीक सभसँ पैघ झूठ’ कहलनि। हुनकर कहब छल जे इस्राइल अपन सुरक्षाक लेल कार्रवाई कऽ रहल अछि। ओ 7 अक्टूबर 2023 केर हमास हमला, बंधक बनाओल गेल लोक आ इस्राइलक सैन्य कार्रवाईक उल्लेख सेहो केलनि।
ईरान आ हिजबुल्लाह पर कार्रवाईक बचाव
नेतन्याहू ईरान पर इस्राइली कार्रवाईकेँ अपन लेल सभसँ आसान निर्णय सभमे एक बतौलनि। अमेरिकी राष्ट्रपति डोनाल्ड ट्रंपकेँ सेहो निर्णायक कार्रवाई लेल धन्यवाद देलनि। भाषणक दौरान ओ सितंबर 2024 केर पेजर विस्फोट केर उल्लेख करैत एकटा पेजर हाथमे उठौलनि। ओ हिजबुल्लाह सहित विभिन्न मोर्चापर इस्राइलक सैन्य कार्रवाईक बचाव केलनि।
वेस्ट बैंकक बस्ती पर सेहो बयान
वेस्ट बैंकमे इस्राइली बस्ती आ फलस्तीनियन लोक पर होइत हिंसाक मुद्दापर नेतन्याहू अंतरराष्ट्रीय आलोचनाकेँ खारिज करैत कहलनि जे बस्तीमे रहनिहार सभमे किछु ‘भटकल नाबालिग उपद्रवी’ छथि। हुनकर दावा छल जे इस्राइल कानून हाथमे लेबाक पक्षमे नहि अछि।
ममदानी पर नेतन्याहूक हमला
न्यूयॉर्कक मेयर जोहरान ममदानी द्वारा नेतन्याहूकेँ ‘वॉर क्रिमिनल’ कहबाक आ गिरफ्तारीक मांग करबाक प्रसंग सेहो भाषणमे उठल। नेतन्याहू ममदानी पर आरोप लगौलनि जे हुनकर चुनाव जीतलाक बाद न्यूयॉर्कमे कतेको यहूदी अपनाकेँ असुरक्षित महसूस करैत छथि।
ममदानी एहि आरोपकेँ खारिज करैत पलटवार केलनि। हुनकर कहब छल जे नेतन्याहू गाजामे फलस्तीनियन लोकक विरुद्ध भेल कार्रवाईकेँ सही ठहराबय लेल झूठ दोहरा रहल छथि। नेतन्याहू दोसर दिसि नरसंहारक आरोपकेँ फेरसँ खारिज करैत कहलनि जे इस्राइल नरसंहार नहि, बल्कि अपन रक्षा करैत अछि।
