भागलपुरमे बाढ़िक पानिमे डूबि एके परिवारक पाँच लोकक मृत्यु

मृतकमेमे तीन महिला, खेत दिसि जाइत काल भेल हादसा

भागलपुर । समदिया

बाढ़िक पानिमे डूबि भागलपुरक बाइपास थाना क्षेत्रक कोयली खुटहा गाममे एके परिवारक पाँच लोकक मृत्यु भऽ गेल। मृतकमेमे तीन महिला सेहो छथि। परिजनक अनुसार सभ लोक खेत दिसि जा रहल छलथि। सड़क पर जमा बाढ़िक पानिक गहराइ बुझि नहि पड़ल आ एकटा बच्ची गहिंर पानिमे चलि गेल। ओकरा बचाबऽक प्रयासमे एक-एक कऽ कतेको लोक पानिमे डूबि गेलथि।

हादसाक बाद स्थानीय लोक सभ बचाव काज शुरू कऽ सभकेँ पानिसँ बाहर निकालि अस्पताल पहुँचेबाक व्यवस्था केलनि। चिकित्सक पाँच़ लोककेँ मृत घोषित कएलक, जखनकि एकटा व्यक्ति गंभीर रूपसँ घायल छथि। हुनकर इलाज मायागंज अस्पतालमे चलि रहल अछि। तीन अन्य लोककेँ फैब्रिकेटेड अस्पतालमे भर्ती कराओल गेल अछि।

मृतकक पहिचान मंचों देवी, सोनाक्षी कुमारी, प्रिंस कुमार, अभिषेक कुमार आ अंशु प्रिया केर रूपमे भेल अछि। घटनाक सूचना भेटिते बाइपास थाना पुलिस घटनास्थल पर पहुँचि जाँच शुरू कऽ देलक। एके परिवारक पाँच सदस्यक मृत्युसँ कोयली खुटहा गाममे शोकक लहरि अछि।

बाढ़िक पानिसँ बढ़ल खतरा

भागलपुरमे गंगाक जलस्तर बढ़लासँ बाढ़िक स्थिति गंभीर बनल अछि। NH-80 केर दुनू कात कतेको स्थान पर दस फीटसँ बेसी पानि बहि रहल अछि। हजारों लोक सामान आ मवेशी लऽ कऽ सड़कक कात शरण लेबाक लेल विवश छथि। सड़क आ आसपासक क्षेत्रमे पानिक गहराइ स्पष्ट नहि रहबाक कारण हादसाक खतरा सेहो बढ़ि गेल अछि।

बिहारक 14 जिला बाढ़िसँ प्रभावित

आपदा प्रबंधन विभागक अनुसार बिहारक 14 जिला—पटना, भोजपुर, सारण, वैशाली, भागलपुर, बेगूसराय, बक्सर, समस्तीपुर, मुंगेर, कटिहार, लखीसराय, खगड़िया, पूर्णिया आ अरवल – बाढ़िसँ प्रभावित अछि। 85 प्रखंडक 527 ग्राम पंचायतक करीब 43.64 लाख लोक प्रभावित भेल छथि।

गंडक, कोसी, बागमती, बूढ़ी गंडक, गंगा, पुनपुन आ घाघरा समेत कतेको नदीक जलस्तर विभिन्न स्थान पर खतराक निशानसँ ऊपर अछि। प्रशासन राहत-बचाव काजक संग नदीक जलस्तर आ बराजसँ निकलऽवला पानिपर निगरानी बढ़ा देने अछि।