नीतीशकेँ कोनो प्रमाणपत्रक जरूरत नहि : ललन सिंह

सोनिया गांधीक टिप्पणी पर पलटवार, गिरिराज सिंह सेहो घेरलनि

पटना । समदिया

कांग्रेसक वरिष्ठ नेत्री सोनिया गांधी द्वारा नीतीश कुमार पर कएल टिप्पणी पर केंद्रीय मंत्री राजीव रंजन सिंह उर्फ ललन सिंह पलटवार कएलनि। ओ कहलनि जे नीतीश कुमारकेँ सोनिया गांधीक कोनो प्रमाणपत्रक जरूरत नहि अछि। ओ अपन काजक आधार पर करीब 20 वर्ष धरि बिहारक सेवा कएने छथि।

ललन सिंह कहलनि जे नीतीश कुमार अपन काजसँ पहिचान बनौलनि अछि आ हुनकर योगदानक आकलन ककरो प्रमाणपत्रसँ नहि कएल जा सकैत अछि। जातीय जनगणनाक मुद्दा उठबैत ओ दावा कएलनि जे नीतीश कुमार एहि मांगकेँ काफी समयसँ उठबैत रहल छथि आ आब केंद्र सरकार जातीय जनगणनाक घोषणा कए प्रक्रिया शुरू कएने अछि।

ओ आरोप लगौलनि जे विपक्षी गठबंधनमे नीतीश कुमार रहबाक समय जातीय जनगणनाक प्रस्तावक मांग कएने छलाह। ललन सिंहक अनुसार, तखनि ममता बनर्जीक आग्रह पर सोनिया गांधी जातीय जनगणनाक जरूरत नहि होयबाक बात कहलनि।

गिरिराज सेहो सोनिया पर साधलनि निशाना

केंद्रीय मंत्री गिरिराज सिंह सेहो सोनिया गांधीक टिप्पणी पर आपत्ति जतौलनि। ओ कहलनि जे सोनिया गांधीकेँ नीतीश कुमारक आलोचना अथवा हुनका ‘गद्दार’ कहबाक नैतिक अधिकार नहि अछि। गिरिराज सिंहक दावा अछि जे नीतीश कुमार अपन राजनीतिक जीवनमे ककरो संग धोखा नहि कएने छथि।

CWC बैठकक बाद बढ़ल विवाद

ई विवाद कांग्रेस कार्यसमिति (CWC)क बैठकमे नीतीश कुमारक INDIA गठबंधन छोड़बाक चर्चा बाद सामने आयल अछि। रिपोर्टक अनुसार, दिग्विजय सिंह कहलनि जे कांग्रेसकेँ नीतीश कुमारकेँ गठबंधनसँ बाहर नहि जाय देबाक चाहैत छल। एहि पर सोनिया गांधी कथित रूपसँ कहलनि जे नीतीश कुमार पहिनेसँ गठबंधनसँ निकलबाक बाट ताकैत छलाह आ समय पर हुनकर बाहर निकलनाइ बेहतर रहल। हालांकि, ‘गद्दार’ शब्दक प्रयोग भेल छल कि नहि, एहि पर अलग-अलग रिपोर्ट सामने आयल अछि।