दरभंगा शिक्षक सीट पर कांग्रेसक मदन मोहन झाक खिलाफ राजद उतारलक कुंवर राय
पटना । समदिया
बिहार विधान परिषदक चुनावमे दरभंगा शिक्षक निर्वाचन क्षेत्रक सीट पर महागठबंधनक भीतर मतभेद खुलि कऽ सामने आबि गेल अछि। कांग्रेस द्वारा वर्तमान एमएलसी आ पूर्व प्रदेश अध्यक्ष मदन मोहन झाकेँ उम्मीदवार बनेलाक बाद राजद सेहो अपन प्रत्याशी डॉ. कुंवर रायकेँ मैदानमे उतारि देलक अछि।
राजदक राष्ट्रीय अध्यक्ष लालू प्रसाद यादव डॉ. कुंवर रायकेँ पार्टीक सिंबल सौंपि आधिकारिक प्रत्याशी घोषित कएलनि। पार्टीक पूर्व प्रदेश प्रवक्ता एजाज अहमदक अनुसार, राष्ट्रीय अध्यक्ष लालू प्रसाद यादवक निर्देश, नेता प्रतिपक्ष तेजस्वी प्रसाद यादवक सलाह आ प्रदेश अध्यक्ष मंगनी लाल मंडलक घोषणाक उपरांत कुंवर रायकेँ उम्मीदवार बनाओल गेल अछि।
शिक्षक राजनीतिमे सक्रिय रहल छथि कुंवर राय
डॉ. कुंवर राय राजद शिक्षक प्रकोष्ठक प्रदेश अध्यक्ष रहि चुकल छथि। शिक्षकक समस्या आ अधिकारक मुद्दा पर सक्रिय रहलाक कारण पार्टी हुनका पर भरोसा जतौलक अछि। हुनकर उम्मीदवारीसँ दरभंगा शिक्षक सीट पर कांग्रेस आ राजदक बीच सीधा मुकाबला बनि गेल अछि।
कांग्रेसक मदन मोहन झा वर्तमानमे एहि सीटसँ एमएलसी छथि। राजदक प्रत्याशीक घोषणासँ महागठबंधनमे सीट बंटवाराक सवाल पर मतभेद सेहो स्पष्ट भऽ गेल अछि।
