एसआइआरक विरोधमे दिल्लीमे नागरिक मार्च, कतेको आप कार्यकर्ता हिरासतमे

नई दिल्ली । समदिया

एसआइआर प्रक्रियाक विरोध आ मुख्य निर्वाचन आयुक्त ज्ञानेश कुमारक इस्तीफाक मांग लऽ कऽ दिल्लीमे नागरिक मार्च निकालल गेल। ऑल इंडिया स्टूडेंट्स एसोसिएशन (आइसा)क नेतृत्वमे मार्च इंडिया गेटसँ शुरू भऽ जंतर-मंतर दिसि बढ़ल। मार्चमे सामाजिक कार्यकर्ता, छात्र संगठनक सदस्य आ आइसा अध्यक्ष नेहा बोरा सेहो शामिल छल। प्रदर्शनक दौरान पुलिस आ प्रदर्शनकारीक बीच नोकझोंक सेहो भेल।

मार्चक मद्देनजर दिल्ली पुलिस जंतर-मंतर आ आसपासक क्षेत्रमे सुरक्षा बढ़ा देने छल। जनपथ मेट्रो स्टेशनक गेट नंबर-2 लग बैरिकेड लगाकऽ जंतर-मंतर दिसि जाएब रोकल गेल। फिरोज शाह रोड पर आरएएफ आ दिल्ली पुलिसक जवान तैनात कएल गेल छल।

आप कार्यकर्ता सेहो हिरासतमे

मुख्य निर्वाचन आयुक्तक इस्तीफाक मांग लऽ कऽ आम आदमी पार्टीक कार्यकर्ता सेहो प्रदर्शन करैत इंडिया गेट दिसि बढ़लाह। पुलिस कतेको आप कार्यकर्ताकेँ हिरासतमे लेलक। आप दिल्ली अध्यक्ष सौरभ भारद्वाज पुलिस पर बदसलूकीक आरोप लगबैत कहलनि जे हुनका संग अनुचित व्यवहार कएल गेल।

एहि बीच प्रदर्शनक दौरान कतेको प्रदर्शनकारीकेँ हिरासतमे लेल गेल।