तेजस्वी यादवक दावा : NDA मे CM बनबाक लेल सभ घटकमे होड़
पटना । समदिया
राष्ट्रीय जनता दल (RJD) केर कार्यकारी अध्यक्ष आ बिहारक नेता प्रतिपक्ष तेजस्वी यादव दावा केलनि अछि जे NDA गठबंधनमे मुख्यमंत्री पदकेँ लऽ कऽ घटक दल सभक बीच होड़ चलि रहल अछि। हुनकर कहब अछि जे केवल चिराग पासवान नहि, बल्कि जीतनराम मांझी, उपेंद्र कुशवाहा सहित BJP आ JDU केर किछु नेता सेहो मुख्यमंत्री बनबाक आकांक्षा राखैत छथि।
ई बयान LJP (रामविलास) केर विधायक राजू तिवारी द्वारा केंद्रीय मंत्री चिराग पासवानकेँ बिहारक मुख्यमंत्री बनेबाक पक्षमे बयान देलाक बाद आयल अछि। पत्रकार सभसँ बातचीतमे तेजस्वी यादव कहलनि जे NDAमे लगभग सभे मुख्यमंत्री बनय चाहैत छथि। हुनका अनुसार, उपेंद्र कुशवाहा, चिराग पासवान आ जीतनराम मांझी मुख्यमंत्री बनबाक इच्छा राखैत छथि, जखनिकि BJPमे सेहो तीन-चारि दावेदार छथि। JDUमे सेहो किछु नेता मुख्यमंत्री पदपर नजरि रखने छथि।
बाढ़िक स्थिति पर केंद्रसँ हस्तक्षेपक मांग
तेजस्वी यादव बिहारमे बाढ़िक विकट स्थिति पर सेहो चिंता व्यक्त केलनि। ओ केंद्र सरकारसँ आग्रह केलनि जे तत्काल भारत सरकारक एकटा टीम बिहार पठाओल जाए आ बाढ़ि प्रभावित क्षेत्रक स्थिति केर प्रत्यक्ष आकलन कराओल जाए। ओ बाढ़ि प्रभावित इलाकामे वायुसेनाक माध्यमसँ भोजनक पैकेट खसाबय केर मांग सेहो केलनि।
प्रधानमंत्री पर साधलनि निशाना
तेजस्वी यादव प्रधानमंत्री नरेंद्र मोदी पर निशाना साधैत कहलनि जे बिहारमे बाढ़िक स्थिति गंभीर रहितो प्रधानमंत्री चुप छथि। ओ महंगाईक मुद्दा पर सेहो केंद्र सरकारसँ सवाल केलनि। हुनकर आरोप छल जे जँ चुनावक समय होइत तँ प्रधानमंत्री एखनि धरि बिहारक दौरा कऽ चुकल रहितथि।
सम्राट सरकार पर बाढ़ि प्रबंधनमे विफलताक आरोप
तेजस्वी यादव कहलनि जे ओ हालमे राघोपुरक बाढ़ि प्रभावित क्षेत्रक दौरा कऽ लोकसभकेँ अपन स्तरसँ सहायता देबाक प्रयास केलनि। मुदा हुनकर आरोप अछि जे सरकारक स्तरसँ पर्याप्त राहत नहि पहुँचि रहल अछि। ओ सम्राट सरकार पर बाढ़ि प्रबंधनमे विफल रहबाक आरोप लगबैत कहलनि जे प्रभावित लोकसभकेँ भोजन आ राहत सामग्रीक पर्याप्त व्यवस्था नहि भेटि रहल अछि।
