भागलपुरमे फेर पलटल नाव, गंगाक तेज धारमे फँसल 11 मजदूर सभकेँ सुरक्षित निकालल गेल

भागलपुर । समदिया

मिथिला क्षेत्रीय बिहारक भागलपुरमे गंगाक तेज धारक कारण फ्लड फाइटिंग काजमे लागल मजदूरसभसँ भरल नाव अचानक पलटि गेल। नावपर 11 मजदूर सवार छलाह। तेज धारक चपेटमे अयलाक बाद नाव गंगाक बीचमे कतेको बेर घुमय लागल, जाहिसँ मजदूरसभक बीच अफरा-तफरी मचि गेल। घटनाक बाद एसडीआरएफक टीम घटनास्थलपर पहुँचि गेल।

बालू मिक्स बोरी लऽ जा रहल छल नाव : जानकारीक अनुसार नावमे बालू मिक्स बोरी लादि कऽ तटबंध दिसि आनल जा रहल छल। गंगाक तेज धारमे फँसलाक बाद नाव अचानक घुमय लागल। स्थिति बिगड़ैत देखि नावपर सवार मजदूरसभ बोरीसभकेँ गंगामे फेकि देलनि। नावक वजन कम भेलाक बाद स्थिति नियंत्रित भेल आ सभ मजदूर सुरक्षित बाहर निकलि गेलाह।

डीएम केर आदेशक बावजूद नावसँ काज पर सवाल : करीब पाँच दिन पहिने सेहो नावसँ जुड़ल हादसा भेल छल। तेज जलधारक कारण जिलाधिकारी अलंकृता पांडे नावसँ फ्लड फाइटिंग काज बंद करबाक निर्देश देने छलथि। एकर बावजूद नावसँ काज कराओल गेलाक बाद प्रशासनिक व्यवस्था पर सवाल उठि रहल अछि। घटना संबंधी सूचना भेटलाक बाद डीएम अलंकृता पांडे सहित नवगछिया पुलिस जिलाक कतेको अधिकारी घटनास्थलपर पहुँचलाह।

एक सप्ताहमे दोसर नाव हादसा : भागलपुरक नवगछियामे पछिला 26 अगस्तकेँ फ्लड फाइटिंग काजमे लागल 21 मजदूरसँ भरल नाव सेहो पलटि गेल छल। एसडीआरएफक टीम 19 मजदूरकेँ सुरक्षित बचा लेने छल, मुदा दू मजदूर एखन धरि लापता बताओल गेल छल।

गंगाक कटावमे 30 वर्ष पुरान दुर्गा मंदिर विलीन : एहि बीच मंगलक भोरमे तटबंधपर स्थित करीब 30 वर्ष पुरान दुर्गा मंदिर सेहो गंगाक तेज कटावक भेंट चढ़ि गेल। जल संसाधन विभागक टीम पहिनेसँ क्षेत्रमे तैनात रहि कटाव रोकबाक काजमे लागल छल, मुदा तेज जलप्रवाहक कारण विभागक तैयारी पर सेहो असरि पड़ल।

तटबंधपर कटाव रोकबाक काज जारी : नवगछियाक खरीक प्रखंडमे किछु समयसँ लगातार गंगाक कटाव जारी अछि। राघोपुर-नरकटिया तटबंधपर कटाव रोकबाक काज चलि रहल अछि। मुदा गंगाक तेज धारक कारण फ्लड फाइटिंगमे लागल मजदूरसभकेँ काज करब कठिन भऽ रहल अछि। बाढ़िक पानि मंत्री बुलो मंडलक घरमे सेहो प्रवेश कऽ गेल अछि। जिलामे करीब 40 हजार लोक बाढ़िसँ प्रभावित भेल छथि।