बिहारमे बाढ़िक खतरा बढ़ल, राजधानी सहित कतेको जिलामे प्रशासनक अलर्ट
पटना । समदिया
बिहारमे बाढ़िक स्थिति शुक्रदिन आरो गंभीर भऽ गेल अछि। गंगा, गंडक, पुनपुन आ दरधा सहित प्रमुख नदी सभक जलस्तर लगातार बढ़ि रहल अछि। एहि कारण राज्यक कतेको नव क्षेत्रमे बाढ़िक पानि पसैर गेल अछि।
जल संसाधन विभागक अनुसार, शुक्रदिन राति धरि पटना स्थित गांधी घाट आ मोकामाक हथीदामे गंगाक जलस्तर अपन उच्चतम बाढ़ि स्तर (एचएफएल) पार करबाक आशंका बताओल गेल। राज्य आपदा प्रबंधन विभाग भोजपुर, पटना, सारण, वैशाली, नालंदा, बेगूसराय, लखीसराय आ जहानाबादक नदी कात आ निचला क्षेत्रमे रहनिहार लोक सभक लेल अलर्ट जारी कऽ सतर्क रहबाक अपील कएलक अछि।
दीघामे गंगा खतरा रेखासँ 1.17 मीटर, गांधी घाटमे 1.67 मीटर आ हथीदामे 1.32 मीटर ऊपर बहि रहल अछि। श्रीपालपुरमे पुनपुन नदी खतरा रेखासँ 2.29 मीटर आ कोलहाचकम दरधा नदी 3.07 मीटर ऊपर अछि।
भागलपुरमे पछिला 24 घंटामे गंगाक जलस्तर 15 सेंटीमीटर बढ़ल अछि। एहि कारण नाथनगर, नौगछिया आ पीरपैंतीक दियारा क्षेत्रमे फेर बाढ़िक पानि पसैर गेल अछि। खेतीक जमीन, खड़ा फसल आ चारा क्षेत्र सेहो जलमग्न भऽ गेल अछि।
खगड़िया सेहो बाढ़िसँ बेसी प्रभावित जिलामे अछि। एतय गंगा खतरा रेखासँ 1.01 मीटर ऊपर अछि। कोसी, बागमती आ बूढ़ी गंडकक जलस्तर सेहो खतरा रेखासँ काफी ऊपर अछि।
राघोपुरमे रेलवे लाइनक कात बनल तटबंधक लगभग पूरा कटि गेलासँ गंभीर भू-क्षरण आ जमीन धँसबाक घटना सामने आएल अछि। गंगाक मुख्य धार रेलवे पटरीक काफी नजदीक आबि गेल अछि, जाहिसँ दू सँ तीन किलोमीटरक क्षेत्र प्रभावित भऽ रहल अछि।
मुंगेरमे 24 घंटामे गंगाक जलस्तर 36 सेंटीमीटर बढ़ल अछि। मधेपुराक आलमनगर आ चौसा प्रखंडमे करीब एक लाख लोक बाढ़िसँ प्रभावित भेल छथि। राहत आ बचाव कार्य लेल अधिकारी 35 नाव तैनात कएने छथि।
बांकामे बरसंदा गाम लग निर्माणाधीन पुल लेल बनाओल गेल वैकल्पिक सड़क मिर्चनी नदीक तेज धारामे बहि गेल। सहरसाक सेहो कतेको गाम जलमग्न भऽ गेल अछि।
बाढ़िक पानिसँ राज्यक कतेको जिलामे सड़क संपर्क बाधित भेल अछि। पश्चिम चंपारणमे योगापट्टी-छोटा चौमुख-सिसवा मंगलपुर सड़क पर यातायात ठप अछि। एतय सड़कसँ दू सँ तीन फीट ऊपर पानि बहि रहल अछि। समस्तीपुरक करीब दू दर्जन गाम प्रभावित अछि आ कतेको ग्रामीण सड़क पानिमे डूबल अछि। पटना स्थित कच्ची दरगाह-बिदुपुर छह लेन पुल पर सेहो यातायात प्रभावित अछि।
वैशालीक राघोपुर प्रखंडक सभ पंचायत बाढ़िसँ प्रभावित भेल अछि। करीब 20 पंचायतक मुख्य सड़क नेटवर्कसँ संपर्क टूटि गेल अछि, जाहिसँ राहत-बचाव कार्य आ स्थानीय लोकक आवागमनमे कठिनाई भऽ रहल अछि।
