बिहार विधानसभामे डिजिटल पहल, विधायक लेल जल्द शुरू होयत मोबाइल ऐप
पटना । समदिया
बिहार विधानसभा अध्यक्ष डॉ. प्रेम कुमार सदस्य आ पूर्व सदस्यक सुविधा लेल मोबाइल ऐप आधारित ‘सिंगल विंडो सिस्टम’ विकसित करबाक निर्देश देलनि अछि। एहि एकटा प्लेटफॉर्म पर विभिन्न सुविधा, सेवा आ आवश्यक जानकारी उपलब्ध होयत।
निर्देशक अनुसार, मोबाइल ऐपक माध्यमसँ सदस्य आ पूर्व सदस्य यात्रा एवं दैनिक भत्ता, चिकित्सा प्रतिपूर्ति, अतिथि निवास सहित अन्य सुविधाक जानकारी आ आवेदनक अद्यतन स्थिति प्राप्त कऽ सकताह।
विधानसभा सचिवालय द्वारा व्हाट्सऐप आ मैसेजक माध्यमसँ सेहो आवश्यक सूचना उपलब्ध कराओल जायत। अध्यक्ष कहलनि जे तकनीकक प्रभावी उपयोगसँ सचिवालयक सेवा सरल, पारदर्शी आ सदस्य-केंद्रित बनत।
अध्यक्षक निर्देश पर विधानसभा प्रभारी सचिव संजय कुमार सिंह एहि दिशामे आवश्यक कार्रवाई तत्काल शुरू कऽ देलनि अछि।
